Qazir joǵary oqý ornyn támamdaǵan jastarǵa mamandyq boıynsha jumysqa turý qıyn. Sebebi ýnıversıtet olarǵa 4 jyldan keıin qajetine asatyn daǵdylardy úıretpeı, teorııamen shekteledi. Joǵary bilim salasynyń negizgi klıenti — jumys berýshi bolǵandyqtan olardyń talaby da eskerilmeı keledi. Qazirgi tańda, jumys berýshilerdi de bilim baǵdarlamalarynyń ózektiligi men sapasy alańdatyp otyr. Atameken UQP-nyń sońǵy málimetine súıensek, jalpy alǵanda jumys berýshilerdiń 68 paıyzy qazirgi oqý baǵdarlamasyna kóńilderi tolmaıdy. Qazaqstanda 60-tan astam JOO-da oqyǵan túlekterdiń jartysy jumyssyzdar qatarynda.
Osy oraıda, « Jumys berýshilerdiń ýnıversıtet túlekterine kóńili tola ma» degen taqyryp QR Bilim jáne ǵylym mınıstrligine qarasty ADAL BILIM jobalyq ofısiniń alańyndaǵy talqylandy. Tikeleı efır barysynda M.S. Nárikbaev atyndaǵy KAZGIýÝ Ýnıversıteti Basqarma Tóraǵasynyń orynbasary Erbolat Muhamedjan halyqty tolǵandyryp júrgen ózekti suraqtar qoıdy.
Joǵary oqý ornyn jańa bitirip kelgen mamandarǵa kóńilińiz tola ma? degen saýalǵa «Báıterek» Ulttyq basqarýshy holdıngi» AQ Basqarýshy dırektory Ádil Nurǵojın jumys berýshi retinde ýnıversıtetterdiń berip jatqan bilimine rıza emestigin jetkizdi. Jumysqa maman alǵanda dıplomyna emes, qolynan ne is keledi, soǵan mán beremiz deıdi.
«Jumysqa turǵan jas mamandy trenıngterge qatystyryp, bárin óziń úıretesiń. Oǵan 1-2 jyl kúsh-jigerińdi jumsaısyń. Maman retinde qalyptasý úshin taǵy 3 jyldaı jumys isteýi kerek degen tujyrymǵa keldim. Ásirese IT mamandyǵyna baılanysty berilip jatqan bilimniń kereksiz tustary kóp. Meniń tájirıbem boıynsha, qazirgi IT-mamandardyń alyp jatqan bilimi jumysqa kelgende mamandyqqa tikeleı qatysy joq bolyp qalady. 4 jyl boıy ýnıversıtette oqyǵany naryqtaǵy jumysyna áseri bolmaıdy. Sondyqtan tehnıkalyq mamandyq boıynsha bilim berip jatqan ýnıversıtetterdiń baǵdarlamalarynyń ózektiligin baqylaý qajet»,– deıdi Ádil Nurǵojın.
«Adyrna» ulttyq portaly.
Foto ashyq derekkózden alyndy.
