2020 jyly 10 myńǵa jýyq etnıkalyq qazaq oralman mártebesin aldy. Bul týraly QazAqparat tilshisi Eńbek mınıstrligine silteme jasap habarlaıdy. Aǵymdaǵy jyldyń 1 qyrkúıegindegi jaǵdaı boıynsha 9,9 myń adam tarıhı Otanymen tabysyp, oralman mártebesin aldy.
Jalpy 1991 jyldan beri respýblıkaǵa 1 mıllıon 67,2 myń etnıkalyq qazaq oraldy. Osy jyly Qazaqstanǵa kelgen oralmandardyń jartysynan kóbi (59,1%) Qytaıdan, 25,6% Ózbekstannan, 8,8% Túrikmenstannan, 3,5% Mońǵolııadan jáne 3% basqa elderden. Kelgen etnıkalyq qazaqtar negizinen Almaty (54,6%) jáne Mańǵystaý (12,7%) oblystaryna, sondaı-aq Nur-Sultan (4,1%) jáne Shymkent qalalaryna (3,1%) qonystandy.
«Kelýshilerdiń ishinde 60%-dan astamy eńbekke jaramdy jasta, al shamamen 5%-y ǵana zeınetkerler. Oralman mártebesin alǵandar, Qazaqstan azamattarymen qatar, Jumyspen qamtýdyń jol kartasy sheńberinde júzege asyrylatyn jobalar aıasynda, Jumyspen qamtý ortalyqtary arqyly jumys taba alady», - dedi QR Eńbek jáne halyqty áleýmettik qorǵaý mınıstrligi Eńbek, áleýmettik qorǵaý jáne kóshi-qon komıtetiniń kóshi-qon monıtorıngi basqarmasynyń basshysy Dastan Aıtqulov.
Aıta ketý kerek, 2019 jyldyń osy kezeńinde 9,6 myńǵa jýyq etnıkalyq qazaq oralman mártebesin aldy, onyń ishinde 53% Ózbekstannan, 26% Qytaıdan, 21% Mońǵolııadan, Túrkmenstannan jáne basqa elderden keldi.
