Áleýmettik jelide halyqty zorlyq-zombylyqqa úgittegeni úshin aıyptalǵan Qýat Hamıtov bostandyqqa shyqty, – dep habarlaıdy «Adyrna» ulttyq portaly.
14 qyrkúıek kúni Polisia.kz Qýat Hamıtovtyń áleýmettik jelide halyqty zorlyq-zombylyqqa shaqyrǵany úshin jaýapqa tartylǵanyn habarlaǵan bolatyn. Bul fakt sotqa deıingi tergeýdiń biryńǵaı tizimine Qazaqstan Respýblıkasy Qylmystyq kodeksiniń 272-baby, 3-bólimi boıynsha tirkelgen.
IIM-niń resmı ókili Nurdildá Oraz da qarjy pıramıdalaryn tergeý isine baılanysty ótken búgingi brıfıngte sportshynyń bul áreketine qatysty qylmystyq jaýapkershilik qarastyrylatyny jaıly málimdedi.
Jappaı tártipsizdikke jáne azamattarǵa qatysty kúsh qoldanýǵa shaqyrý, arandatý úshin úsh jylǵa deıin bas bostandyǵynan aıyrylýy nemese osy merzimge bas bostandyǵyn shekteýi múmkin sportshynyń búgin Instagram áleýmettik jelisinde vıdeoúndeýi jarııalandy. Sportshy: «...Dezınfektor týraly tarap ketken vıdeoǵa qatysty: ol vıdeo qaljyń retinde túsirilgen vıdeo. Men eshkimdi jappaı kótiriliske shaqyrmaımyn jáne ondaı áreket istemeńizder», – dep aqtalǵan.
Vıdeoúndeý jarııalanǵannan keıin kóp uzamaı sport jýrnalısi Serik Noıan Instagram paraqshasynda Qýat Hamıtovtyń bostandyqqa shyqqany jaıly aqpar jetkizdi. Ázirge atyshýly sportshyǵa qatysty qylmystyq istiń aıaqtalǵandyǵy týraly eshbir derek joq.
Esterińizge sala ketsek, bul Qýat Hamıtovtiń eldegi koronavırýs ınfekııasymen kúres sharalaryna qatysty týdyrǵan birinshi daýy emes. Buǵan deıin sportshy koronavırýstyń ótirik ekendigin, sondaı-aq vırýsqa qarsy vakınany depýtattar eń birinshi óz balalaryna synap kórýi jaıly da jazba jarııalap, synǵa ilikken.
Foto ashyq derekkózden alyndy
«Adyrna» ulttyq portaly
