Qaıyrymdylyq - qaıyrly is. Elimizde 4 myńǵa jýyq ata-anasynyń qamqorlyǵynsyz qalǵan bala, 367 myń az qamtylǵan otbasy, 698 myń múmkindigi shekteýli jan bar. Olardyń barlyǵy da kómekke zárý. Bir qýantarlyǵy, sońǵy jyldary qaıyrymdylyq qorlarynyń sany jyl sanap ósip keledi. Muqtaj jandarǵa kómektesip, ıgi isterdi atqaryp júrgen sondaı qorlardyń biri - «Izetti is». Negizgi maqsaty - múmkindiginshe muqtaj jandarǵa járdemdesý, balalarǵa shattyq syılaý.
Stýdentterdiń bastamasymen qurylǵan «Izetti is» qaıyrymdylyq qory búginde biraz janǵa kómek qolyn sozyp úlgerdi. «Adyrna» ulttyq portaly qor uıymdastyrýshysy Muqasan Berdihanmen áńgimelesti.
- Biz erikti túrde nıettes qyz-jigitter bolyp, muqtaj adamdarǵa kómekteseıik degen nıetpen birikken edik. Bastapqyda qor ashamyz degen maqsat bolmady. Keıinnen qatarymyz kóbeıip,jobalarymyz men maqsattarymyz aýqymdyraq bola bastaǵannan soń qor retinde qurylýdy jón sanadyq. 2019 jyldyń 9 jeltoqsanynda resmı memlekettik tirkeýden óttik.
Qazirgi tańda «Izetti istiń» kópbalaly otbasylar men múmkindigi shekteýli jandarǵa kómektesetin «Baqytty otbasy», balalarynyń úıiniń tárbıelenýshilerimen jumystanatyn «Sábı» jáne ártúrli qaıyrymdylyq akııalaryn uıymdastyratyn «Meıirimdi qala» atty úlken jobalary bar.
Suhbat barysynda Muqasan myrza qaıyrymdylyq jasaý úshin shynaıy nıettiń jetkilikti ekenin atap ótti.
- Qaıyrymdylyq sharalaryn uıymdastyrýdyń eshqandaı da qıyndyǵy joq. Keıde kishkentaı ǵana máseleler shyǵyp qalyp jatady. Bul ispen erikti túrde, shyn nıetpen aınalysyp júrgendikten olardy tosqaýyl retinde sanamaımyz.
Qaıyrymdylyq bir-birine uqsamaıtyn, biraq álemdi birge jaqsartýdy maqsat etken jandardy biriktiredi.
- Komandamyzda 50-den astam erikti bar. Olar Almaty, Taraz, Jetisaı qalalarynda kóp shoǵyrlanǵan. Biz eriktilerge naqty bir talap qoımaımyz. Moraldyq, materıaldyq kómegim tıse boldy degen árbir jan qatarymyzǵa qosyla alady.
«Izetti istiń» qurylǵanyna 1 jyl boldy.
- Osy ýaqyt aralyǵynda muqtaj jandarǵa múmkindigimizshe septigimizdi tıgizýge tyrystyq. Biz eń aldymen kómekke zárý adamdardyń jaǵdaıymen tanysamyz, olardan statýsyn rastaıtyn qujattaryn usynýyn ótinemiz.
Qor Maqtaral aýdanyndaǵy sý tasqynynan zardap shegip, úı qujattary durys bolmaı, memleket nazarynan tys qalǵan 10 otbasyǵa úı qurlysyna kerek degen zattaryn, al 20 otbasyǵa turmysqa qajetti zattardy alyp berdi jáne "Molla Ismaıl" meshitiniń qurlysyna kómektesti. Sondaı-aq, Ramazan aıynda áleýmettik jaǵdaıy tómen 50 otbasyǵa azyq-túlik pen aýyzashar mázirin tarattyq.
Bul «Izetti is» jasaǵan ıgi isterdiń bir parasy ǵana.
- Qorǵa kómektesip júrgen meenattar joq, biraq birshama turaqty salymshylarymyz bar.
«Izetti is» qaıyrymdylyq qory árbir qaıyrymdylyq sharasynan soń mindette túrde esep berip otyrady. Erikti bolamyn, qaıyrymdylyq jasaımyn deseńizder, marhabat. Jaqsylyq jasap jarysaıyq!
Dıana ASAN,
«Adyrna» ulttyq portaly
