«Abaı jolymen» kele jatqanmyn. Ǵabıt Músirepovtyń «Ulpanyn» kezdestirip qaldym. Burynnan tanımyn ǵoı, jón surasam, epostyq jyrdaǵy– «Baıan sulý» saýda ortalyǵynda Muhtar Maǵaýınniń «Alasapyrany» (Menedjer degenim ǵoı..) bolyp jumys istep jatyr eken. Ózimshe «dvıjenıe» jasaǵym kelip ketti. Sábıt Muqanovtyń «Móldir mahabbatyn» basymnan ótkerip turmyn. Baıaǵyda Tynymbaı Nurmaǵanbetovtiń «Ata qonysyna» barǵanymda, bir ret kórgenmin. Boıjetip qalypty. Júsipbek Aımaýytovtyń «Aq bilegindeı bilegi appaq eken... Spandııar Kóbeevtiń «Qalyń malyn» tólep, úılenip alsam ba eken? Áı, biraq qý kedeıshilik-aı, Beıimbet Maılınniń «Seksen somy» jetpeıdi ǵoı. Meıli, Maǵjannyń «Batyr Baıany» sııaqty ólip ketsem de shirenip turýym kerek qoı. Ólgeni qurysyn, Berdibek Soqpaqbaev jazyp ketken: «Ólgender qaıtyp kelmeıdi»... Shynymdy aıtsam, Ábdijámil Nurpeısovtiń «Qan men terindeı» terlep kettim. Qyz da úndemeıdi.Tutqabaı Imanbekovtiń «Tut aǵashynyń kóleńkesinde» áli turmyz. Bul qyz maǵan Muqaǵalı Maqataevtiń «Armany» sııaqty ma? Joq álde, Shyńǵys Aıtmatovtyń «Jan pıdasy» degendeı, alyp qashsam ba? Sottalyp ketemin-aý! Rymǵalı Nurǵalıdyń «Aıaqtalmaǵan tragedııasy» bolyp júrsem she? Ne dep kettim? Sáken Imanasov sııaqty «Aıtar edim», biraq tilim kúrmelip...
–Keshirińiz, Teodor Draızerdiń «Aıaýly Kerrıine» uqsaıdy ekensiz...– dedim men.
– Aǵaı, Halldor Laksnesstiń «Armanyn ańsaǵan jandar» kúıin keshken jalǵyz siz emes...–dedi boıjetken nazdanyp.
–Keshirińiz, Ázilhan Nurshaıyqovtyń «Mahabbat qyzyq, mol jyldaryn» bastasaq qaıtedi? –dep ázildedim men de.
–Mustafınniń «Mıllıoneri» bolsańyz, kóremiz...
–Hamıt Erǵalıevshe «Bizdiń aýyldyń qyzy» ǵoı, qarapaıym qaryndasty jolyqtyrdym dep oılap tursam... Aqshany ǵana oılaǵansha, Bekhojınniń «Márııam Jagor qyzynan» úlgi alsańyz edi!
–Aǵaı deımin, ázildi kótere almaısyz ba, júdá Tahaýı Aqtanovtyń «Qaharly kúnderine» uqsap barasyz...
–Ilııas Esenberlınniń «Jantalasyndaı» jarmasyp jatqanym ǵoı, qaryndas...
–Nemene, Sáken Júnisovtiń «Aqan serisi» me edińiz?
–Aıtpaqshy, qolyńyz bos pa? Kafege baryp, Rollan Seısenbaevtiń «Túngi dıalogyn» bastasaq?
–Muratbekovtiń «Aı týar aldynda» ma?
–Iıa. Ǵabıt Músirepovtiń «Kezespeı ketken bir beınesindeı» ah uryp qalmaıyn dep...
–Jaraıdy... Sheksıpırdiń «Korl Lırindeı» qoımadyńyz ǵoı.
O, «Móldir mahabbat!» «O, Mahabbat qyzyq mol jyldar»! Maqataevtiń «Aqqýlary uıyqtaǵanda» «Ulpannyń» qypsha belinen qapsyra qushaqtap, Qalı Sársenbaıdyń «Tulǵa –taǵdyryndaı» bolmasam da, keýdemdi kere ustap, «Oıanǵan Ólke» –Shymqalanyń shyraıly kóshelerinde «Almas qylyshtaı» jarqyrap kele jattym... O, Mahabbat!
Muhtar Sherimniń qyshqyl satırasy,
«Adyrna» ulttyq portaly
