QR Prezıdenti Qasym-Jomart Toqaevqa Jambyl oblysy, Jýaly aýdany ortalyq aýrýhanasyna qarasty Farıda Janbatyrova atty emhana qyzmetkeri vıdeoúndeý jasady.
Emhana qyzmetkeri karantın kezinde indettiń aldyn alý sharalaryna baılanysty birinshi bekette rentgen laborant bolyp jumys istegen. Emhana basshylyǵy qyzmetkerlerge beriletin qosymsha eńbekaqyny qaıtarýdy talap etken.
"Qazaqstan Respýblıkasynyń Prezıdenti Qasym-Jomart Toqaevqa!
Men, Janbatyrova Farıda Qanatbekqyzy 1995 jyldan beri Jýaly aýdany ortalyq aýrýhanasyna qarasty emhanada rentgen-laborant bolyp qyzmet atqaramyn. 2020 jyldyń sáýir aıynan bastap aýrýhanaǵa kireberis jerdegi birinshi bekette tańǵy saǵat 07:30-dan keshki 17:30-ǵa deıin jumys istedim. Sáýir aıynda esepshotymyzǵa aılyǵymyzǵa qosymsha retinde úkimetten 160 myń teńge tústi. Oǵan kóp-kóp raqmet aıtamyn. Endi bizdiń emhana basshylary osy 160 myń teńgeniń 39 myń teńgesin qaıtarýymyzdy talap etti. "Nege" dep suraq qoıǵanymda "Joǵarydaǵy basshylardyń talaby, solarǵa qaıtaryp beremiz" dedi. Bekette otyrǵan barlyq qyzmetkerden osyndaı jolmen aqshany jınap aldy. Men de sol aqshany óz qolymmen kassır Elmıraǵa aparyp berýge májbúr boldym. Maı (mamyr) aıynda koronavırýs indetine baılanysty aılyqtan bólek qosymsha 200 myń teńge tústi. Aqsha túskennen keıin, bas dárigerdiń orynbasary Abzal Dáýletbaıuly Baıtóreev kabınetine qyzmetkerlerdi jeke-jeke shaqyryp, sonyń ishinde meni de shaqyryp, 200 myń teńge túsetinin, onyń 150 myń teńgesin qaıtaryp berýin talap etti. Men 150 myń teńgeni qaıtarmaǵandyqtan, 26 maýsymnan (26.06. 2020j) bastap meni beketten alyp tastady" dep úndeý jasady.
Dáriger osy isti ádil tekserip, kinálilerdiń jazalanýyn, jumysyna qaıta oralyp, mańdaı terimen tapqan aqshasyn qaıtarýyn suraıdy.
Qazir bul is boıynsha tergeý amaldary júrip jatyr. Aldaǵy aýqytta istiń anyq-qanyǵy jaıly aqparat beretin bolamyz.
"Adyrna" ulttyq portaly
