Qostanaı oblysynyń ákimi Arhımed Muhambetov saqtyq sharalaryn jasaǵanyna qaramastan koronavırýs juqtyrdy. Óziniń ınstagram jelisindegi paraqshasynda turǵyndarǵa kútiný kerektigin aıtty.
"Qurmetti qostanaılyqtar! Barlyq saqtyq sharalaryn saqtaǵanyma qaramastan, meniń COVID-19-ǵa tapsyrǵan synaǵym oń nátıje (aýrý belgisi anyqtaldy - red.) kórsetti. Osyǵan baılanysty men oqshaýlanýǵa ketemin jáne jumysymdy qashyqtan jalǵastyramyn. Oblys turǵyndarynan barlyq qaýipsizdik sharalaryn saqtaýdy suraımyn.
Taǵy da jerlesterimizdi aımaq aýmaǵynda engiziletin shekteý sharalaryn saqtaýǵa zor jaýapkershilikpen qaraýǵa shaqyramyn. Barshańyzǵa zor densaýlyq jáne amandyq tileımin! Ózińizdi kútińiz!", - dep jazdy ákim.
"Adyrna" ulttyq portaly
