Torǵaı dalasynan saq dáýirine jatatyn «Altyn buıymdy adamnyń» qorymy tabyldy. Bul týraly "Qazaqstan" ulttyq arnasy habarlady.
Arheologtar mundaı kóne jádiger bul ólkede alǵash ret kezdesip otyrǵanyn aıtady. Iaǵnı, aımaqtyń tarıhy úshin – «Altyn adam» tabylǵanymen birdeı.
Bizdiń jyl sanaýymyzǵa deıingi 7-6 ǵasyrǵa jatatyn ejelgi Saq qorǵany Arqalyqtan 80 shaqyrym jerde Saba jáne Torǵaı ózenderiniń túıisken tusynda tur. Ornalasqan jerdiń batysynda Torǵaı jazyǵy jatyr. Al shyǵysqa qaraı Ulytaý silemderi bastalady.
Qos ózen toǵysyp, jazyq pen taý silemderi túıisken tus – kóne Saq taıpalarynyń qorymy bolǵanǵa uqsaıdy. Osy jerde 20 shaqty obanyń orny bar. Qazba jumystary 2017-shi jyly bastalypty. Sodan beri tórt oba zerttelgen. Alaıda, tarıh úshin asa baǵaly qazyna sońǵysynan tabyldy. Arheologtar bul qorymǵa saq bekzadalarynyń biri jerlengen dep esepteıdi.
Ábdinur Nusqabaı, arheolog:
Altyn zattaryna qaraǵanda áleýmettik joǵary toptyń ókili ekendigi belgili. Qurylysy men arhıtektýralyq ereksheligi shendi adam bolǵandyǵyn (tabylǵan adam - red.) kórsetedi.
Tek áshekeıler ǵana emes, kıimderiniń ózi óte usaq altyn monshaqtarmen bezendirilgen. Buıymdardyń jasalýy da óte kúrdeli. Bul Saq zergerleriniń sheberligin, altyndy óndirý men óńdeýdi qanshalyqty tereń meńgergendigin kórsetedi. Eń bastysy - ár zat ólkeniń kóne zamandaǵy tarıhynan qundy derekter jetkizip tur.
Qorǵannan tabylǵan jádigerler aldymen hattalyp, keıin murajaılarǵa tapsyrylady. Al qazba jumystary júrgiligen jerdiń ózin týrızm nysanyna aınaldyrý josparda bar. Alaıda kóne qorym kúre joldan jyraqta jatyr. Sondyqtan bul jospardy qalaı, qaıtip júzege asyrýǵa bolatyny ázir beımálim.
Dáýrenbek ÁBDIBEK,
"Qazaqstan" ulttyq arnasy
