Qalqaman kenti turǵyndary búgin qotandaǵy maldy óriske emes, ákim keńsesine aıdap keldi. Kók shyqqaly bir aıdan assa da, kóterilmegen zeńgi baba tuqymy osy mańdaǵy kókti birden japyryp jiberdi.
Maldyń jelini tartylyp qalǵany jaıylymnyń joqtyǵynan ǵana emes. Aýyldan qol sozym jerge kókónis salyp tastaǵan fermer alqaptardy sýarý úshin shaǵyn toǵandy da menshigine qaratyp alǵan. Bul jerde jer asty sýynyń kózi bar.
Amaly taýsylǵan turǵyndar temir jol men tas joldyń ortasyndaǵy alaqandaı aýmaqqa mal jaıýǵa májbúr. Buǵan jetý úshin de birneshe shaqyrym jol júrk kerek. Sonyń ózinde bul aýmaq malǵa da, janǵa da qaýipti bolyp tur.