Memlekettik komıssııanyń shuǵyl shtaby 42 500 teńge áleýmettik kómekti taǵaıyndaý boıynsha esep berdi, dep habarlaıdy Sputnik Qazaqstan.
Resmı málimetke sáıkes, tótenshe jaǵdaı kezinde tabysynan aıyrylǵan 3 mıllıonnan astam adamǵa 42 500 teńgeniń áleýmettik tólemi aýdaryldy. Qarjynyń jalpy kólemi – 127 mıllıard teńge.
Halyqtan barlyǵy 5,9 mıllıon ótinim túsken. Sonyń ishinde 2,15 mıllıon, ıaǵnı 37% boıynsha tólem taǵaıyndalǵan joq.
Negizgi sebepteri:
- 157 myńǵa jýyq ótinimde adamnyń jeke deregi durys kórsetilmegen. Bir áripte nemese sanda qate ketse, áleýmettik tólem taǵaıyndalmaıdy;
- 80 myńǵa jýyq ótinimde bank derekteri durys jazylmaǵan. Ótinim bergende bank ataýy men IBAN-dy (shottyń 20 belgiden turatyn nómiri) kórsetý qajet. Kóbisi bank kartasynyń nómirin jibere salǵan;
- Ótinim berýshiniń turaqty jumysy bar bolyp shyqqan. Olardyń ishinde memlekettik qyzmetkerler jáne bıýdjettik uıymdardyń qyzmetkerleri de bar;
- 863 myńǵa jýyq ótinimdi zeınetaqy jáne járdemaqy alýshylar jibergen. Olar tótenshe jaǵdaıǵa deıin resmı jumys istemegen;
- 1,16 mıllıon ótinim boıysha sońǵy 12 aıda eshqandaı áleýmettik aýdarym jasalmaǵan, bir ret bolsa da, biryńǵaı jıyntyq tólem aýdarmaǵan. Ondaıda 42 500 teńge berilmeıdi;
- 534-ke jýyq ótinim qaıtys bolǵan adamdardyń atynan nemese Qazaqstannan tys jerde turatyndardyń atynan jiberilgen.
"Ótinim berýshi usynǵan derekterdi teksere kele, jumys berýshiniń qashyqtan jumys isteýge ruqsat etkeni nemese tolyq emes jumys kúnine aýystyrǵany, uıymnyń jalpy amalsyzdan toqtap turǵany anyqtalýda. Mundaı jaǵdaıda jumys berýshi tarap jumysshylarǵa jalaqy tóleýi tıis. Degenmen uıym basshylyǵy jalaqysy saqtalmaıtyn demalysqa jiberetini jaıly buıryq shyǵarmasa da, jumysshylar "42 500 teńge" tólemge ótinim berýge árekettenýde",- delingen resmı habarlamada.
Qazirgi kezde eńbek jáne halyqty áleýmettik qorǵaý mınıstrligi jergilikti atqarýshy oryndarmen birlese otyryp, jaldamaly jumysshy bolyp sanalatyn ótinim berýshilerdiń aqysyz demalysqa shyqqany ıa shyqpaǵanyn tekserýge kiristi.
