Kesheden beri osynda Qazaqstanda koronavırýs dertine shaldyqqan 600-den asa adamnyń 120 adamy, ıaǵnı, 19%-y dárigerler degen derek tarady. Óte qorqynyshty, jáne alańdarlyq derek. Sebebi, ınfekııanyń naǵyz oshaǵy bolǵan Italııanyń ózinde bul kórsetkish 14% bolsa, Ispanııada 12%, Germanııada 2,5%, Qytaıda 4% aspaǵan. Al bizde – 19%! Iaǵnı, dertke shaldyqqandardyń besten biri degen sóz!
Endigi qyzyqty qarańyz. Osynda jeli qoldanylýshylary arasynda «Prezıdent Toqaev dárigerlerge beretin ósimpuldy belgilegennen keıin, dárigerler osylaı jappaı juqtyra bastady nemese juqtyrdyq dep ótirik aqparat bere bastady» degen pikirler boı kótere bastady. Mundaı pikir bildirý – jumsartyp aıtqanda, qııanat («ıttik» deýge biraz dostarymnyń kóńiline keler dep, tejelip otyrmyn), dostar!
Biz bir nárseni uǵyp alsaq. COVID-19 – «juqtyrsam, emdelip alam ǵoı!» dep táýekelge baratyn, naqty vakınasy, shtamy bar siz ben biz biletin aýrý emes. Ony eldegi aýrýdan aıyqqandardyń sanyna, paıyzdyq mólsherlemesine qarap ańǵarýǵa bolady. Al olardy emdep jatqan dárigerler muny bizden artyq biledi. Bul jerde bylaı aıtqanda «rýsskaıa rýletka» sııaqty. Immýnıtetiń myqty,tamaǵyń durys, uıqyń, mıyń tynysh adam bolsań, Qudaı ońdap, atalaryń qoldap, dertti jeńýiń múmkin. Bul bes qarýyń saı bolmasa, kettim deı ber.
Al endi, dárigerlerdiń jaǵdaıyna týra qaraıyq. Áý basta osy indet bastalǵaly onymen betpe-bet kelgen osy dárigerler. Olardyń qataryna jalpy praktıkadaǵy (VOP), ýchaskelik dárigerlerden bastap, jedel járdem jáne ıntensıvti terapııa dárigerlerine deıingi dárigerlerdiń tutas armııasy kiredi. Tótenshe jaǵdaı jarııalanbaı otyryp, munyń bári kúndelikti sol naýqastarmen qoıan-qoltyq jaǵdaıda jumys jasady.
Odan qala berdi, soǵystyń alǵashqy jyldaryndaǵy ekeýara bir vıntovka tıgen atalarymyz sııaqty, qorǵanysh materıaldary jetkiliksiz jaǵdaıda, bir rettik qorǵanysh kıimin birneshe ret jýyp kıip, jumys jasady (bul týraly da jazyldy). Kópshilik dárigerlerge maskalar jetkiliksiz boldy. Sondaı qarbalas jaǵdaıda, maman tapshylyǵy bolǵandyqtan, kún tún demeı uıqysyz, durys tamaqsyz osy eldiń azamattaryn aýrýdan arashalap qalý úshin damylsyz jumys jasady. Aqparat úshin aıta keteıin, tek Almatydaǵy I.Jekenova atyndaǵy aýrýhananyń ózi kúnine shamamen 140 adamǵa deıin qabyldap otyrǵan! Dárigerler aıaqta kerzi etik, ústide «skafandr», onyń syrtynan dojdevık syndy bir rettik jabyn, bette maska, onyń syrtynan respırator, kózde shańǵyshylardikindeı kózildirikpen toqtaýsyz aıaqtarynan tik turyp uıqysyz qyzmet etken. Tamaq pen transport jaǵdaıynyń qandaı bolǵanyn jazdyq. Osynda bárimiz jappaı shýlap júrip ony bertinde ǵana túzettik. Sonda, búkil aýasy lastanǵan jerde 24 saǵat toqtaýsyz shapqylap, sileleıtin, uıqy kórmegen, durys tamaq ishpegen, psıhologııalyq qysymda júrgen, ımmýnıtetteri plıntýstan tómen qulaǵaǵan dárigerler juqtyrmaǵanda, úıde karantınde dıvanda jatqan bizder juqtyramyz ba?
Dostar, eger men qolymda zákún kúshi bar adam bolatyn bolsam, dál qazir sol ótemaqyny ınfekııalyq juqpaly aýrýhanalarda qyzmet etip jatqan árbir dárigerinen bastap, kúzetshisine deıin, olardan bólek ýchaskelik dárigerlerden bastap, kim osy dertpen kúreske janama bolsyn aralassa, eshbirin alalamaı bergizer edim. Sebebi, olardyń jegen asy – adal, eńbekteri zor. Oǵan olardy sol ótemaqy úshin aýrý juqtyrdy dep sáýegeısimeı, solardyń ornynda bir kún jumys jasap kórsek kóz jetkizer edik.
P.S. Aıtpaqshy, ótemaqyǵa baılanysty ótkende jazylǵan posttyń nátıjesine toqtala keteıin. Almatydaǵy I.Jekenova atyndaǵy juqpaly aýrýlar aýrýhanasynyń basshylyǵy ótkende ótemaqyǵa qatysty jazylǵan posttan keıin, bakterıologııalyq laborotorııanyń qyzmetkerlerine ótemaqy beretin bolypty da, Laborotorııalyq bólim men zararsyzdandyrý bólimin (sterılnyı blok) áli de shómishten qaǵyp otyr eken. Muny «sabotaj» dep ataǵannan basqa sóz túspeı otyr aýyzǵa. Jaǵdaı áli de túzelmese, Prezıdenttiń atyna ashyq hat jazý ǵana qalady.
Nuraddın Sadyqovtyń jelidegi jazbasynan
