Taraz qalasy 7 säuırden bastap karantin rejimıne köşedı, - dep habarlaidy «Adyrna» ūlttyq portalynyŋ tılşısı.
Karantin rejimıne bailanysty qala äkımdıgı şūǧyl daiyndyq şaralaryn jürgızıp jatyr. Atap aitqanda, qalaǧa kıretın 7 post beketınıŋ ärqaisysyna 2 palatkadan jetkızılıp, ondaǧy qyzmetkerler azyq-tülıkpen, jatyn orynmen qamtamasyz etıldı. Atalǧan 7 post kamera arqyly qala äkımşılıgınde baqylauda bolady.
Karantin rejimıne qatysty Taraz qalasynyŋ äkımı Aitqazy Däuletqūlūly Jambyl oblysy öŋırlık kommunikasiialar qyzmetınde mälımdeme jasady.
Qūrmettı qala tūrǧyndary!
Taraz qalasynyŋ Bas memlekettık sanitarlyq därıgerınıŋ qaulysymen 7 säuır künı saǧat 00.00-den bastap qala aumaǧynda karantin rejimı engızıledı. Osyǧan bailanysty qalalyq äkımdıktıŋ janynan jedel ştab qūryldy. Ştab qūramyna qalanyŋ barlyq bölımderı, polisiia, SES mamandary engızılgen. Ştab täulık boiy jūmys ısteidı jäne arnaiy jedel telefon ıske qosylǧan – 43-15-16, 45-59-85 Karantin jariialanǧannan keiın barlyq avtokölık qūraldarynyŋ jäne azamattardyŋ qala aumaǧyna kıruıne jäne şyǧuyna tyiym salynady. Azyq-tülık tauarlaryn, medisinalyq būiymdar men preparattaryn, bırınşı kezekte qajettı tauarlardy tasymaldaityn, köktemgı egıs jūmystaryn jürgızetın avtokölık qūraldarynyŋ jüruıne arnaiy rūqsat qaǧazymen ǧana rūqsat berıledı. Rūqsat qaǧazdaryn jergılıktı äkımdıkten ala alasyzdar. Qoǧamdyq kölıkter saǧat 7-00-den 20-00-ge deiın jūmys ısteitın bolady. Osyǧan bailanysty adamdardyŋ jäne jeke kölıktıŋ Taraz qalasynyŋ aumaǧynda erkın jürıp-tūruyna tyiym salynady: - jūmys ornynan anyqtama bolǧan jaǧdaida tūrǧylyqty jerınen jūmys ornyna deiın jäne kerı jürıp-tūru; - azyq-tülık tauarlaryn, därılık preparattardy jäne medisinalyq būiymdardy satyp alu; - medisinalyq kömekke jügınu; - memlekettık jäne äleumettık kömek alu maqsatynda memlekettık mekemelerge baru; - kütpegen tötenşe jaǧdai jäne adamnyŋ ömırı men densaulyǧyna qauıp töndıretın basqa da jaǧdailar kezınde. Būl rette, otbasy müşelerın qospaǧanda, adamdardyŋ 3 adamnan artyq toptasuyna, sondai-aq kämeletke tolmaǧandardyŋ eresekterdıŋ erıp jüruınsız jürıp-tūruyna tyiym salynady. Jeke tūlǧalar, avtokölık jürgızuşılerı jeke qorǧanu qūraldaryn paidalanuǧa mındettı. Azyq-tülık supermarketterı, azyq-tülık dükenderı, därıhanalar, veterinariialyq därıhanalar, auyl şaruaşylyǧy tehnikasyna arnalǧan avtobölşekter, auyl şaruaşylyǧy januarlaryna arnalǧan jem-şöpterdı ötkızuge rūqsat berıledı. Meiramhanalarǧa, dämhanalarǧa, barlarǧa, ashanalarǧa jäne basqa da qoǧamdyq tamaqtanu nysandaryna "tūtynuşylarǧa jetkızıp beru" rejimı boiynşa saǧat 10.00-den 22.00-ge deiın jūmys ısteuge rūqsat etıledı. Al, ırı sauda üilerı, oiyn-sauyq ortalyqtarynyŋ, bazarlardyŋ, barlyq azyq-tülık emes tauarlar sauda nysandarynyŋ, avtosalondardyŋ, avtoqosalqy bölşekter satu salondarynyŋ, gül pavilondarynyŋ qyzmetı toqtatylady. Halyqtyŋ jappai jinalatyn oryndaryna, onyŋ ışınde saiabaqtarǧa, skverlerge, jaǧalaularǧa, alaŋdarǧa, balalardyŋ oiyn alaŋdaryna jäne qala tūrǧyndarynyŋ özge de demalys oryndaryna baruyna tyiym salynady. Barlyq qyzmet türlerın körsetu oryndary, bank bölımşelerı jäne lombardtar, "Qazpochta" AQ bölımşelerı, qonaq üiler, sondai-aq döŋgelek montajdauǧa arnalǧan jeke tūrǧan bokstar jūmys ısteidı. Qala tūrǧyndaryn karantin kezınde barlyq saqtyq şaralaryn ūstanyp, üilerıŋızde qaluǧa şaqyramyn."Adyrna" ūlttyq portaly
