Shyǵys Qazaqstan oblysyndaǵy Berel jazyǵyndaǵy saq patshalary jerlengen obalardan arheologtar taǵy da tyń jańalyq ashty. Nómiri 2-nshi qorǵannan óz zamanynda óte yqpaldy tulǵa bolǵan adamnyń múrdesi men altynmen aptalyp, kúmispen kúptelegen 7 at tabyldy – dep habarlaıdy Habar arnasy.
Iá, arheologtardyń aldyn ala boljaýynsha altynmen aptalǵan bul attar saqtar dáýirine tıesili. Nómiri ekinshi qorǵannan ázirshe 2 attyń súıegi shyqty. Arheolog Zeınnolla Samashev altyndalǵan taǵy 5 attyń súıegi jatqanyn aıtady. Al eń mańyzdysy osy qorǵanda basyna úlken qumyra qoıylyp, sol dáýirde saq patshalaryna yqpaly bolǵan taǵy bir adam jerlenipti. Ázirshe ol tolyq ashylǵan joq. At ábzelderi altynnan quıylǵan túrli qustardyń beınesimen bezendirilgen.
Zeınolla Samashev, arheolog, tarıh ǵylymdarynyń doktory:
– Elimizdiń shırek ǵasyrlyq mereıtoıyna bizde ózimizshe syı tartaıyq dep oıladyq. Bıylǵy jyly arheologııalyq qazba jumystary Berelde jalǵasqan bolatyn. Nómiri 2-nshi obadan asa qundy oljalar taýyp otyrmyz. Ulttyq tarıhymyzdyń sol aqtańdaq shaqtarynyń barlyǵyn sheshetin jaqsy qundylyqtar tabylyp jatyr. Áli de tabylady. Jer betinen jeti metr tereńdikte jerlengen qorǵannyń eni 4, uzyndyǵy 5 metr bolady. Al 20 jyl buryn 11-inshi qorǵannan tabylǵan jádigerler búginde ulttyq murajaıda tur.
Oljas Kereıhan, tilshi:
– Jalpy Berel jazyǵynda saq patshalarynyń 100-den astam qorǵany shoǵyrlanǵan. 1998 jyldan bastap arheologııalyq qazba jumystaryn júrgizip keledi. Nátıjesinde keshegi tasqa qalaǵan tarıh búgingi ulttyq tarıhymyzǵa mol mura bolyp qosylyp jatyr. Endi osy murany nasıhattaý úshin qorǵandardyń ózinen aspanasty murajaıy jasaqtalmaq. Ol úshin oblystyq bıýdjetten 40 mıllıon teńge bólinetin boldy. Al aldaǵy jyldary óńirdegi barlyq arheologııalyq qazba jumystarynan tabylǵan jádigerlerden úlken murajaı salynbaq.
Danıal Ahmetov, oblys ákimi:
– Bes jyldyń ishinde biz Óskemende murajaı salýymyz kerek. Oǵan tamasha múmkindigimiz bar. Az ýaqyttyń ishinde tamasha ǵımarat salyp, myńdaǵan kisiler qazaqtyń tamasha jerine kelý kerek. Bıyl oblystaǵy úsh aýdanda arheologııalyq zerteý júrip jatyr. Qyrkúıek aıynda osy qazba jumystardyń nátıjesi boıynsha Ortalyq Azııa men Eýropadaǵy belgili ǵalymdardyń qatysýymen úlken basqosý ótpek. Sol kezde 2-nshi qorǵannan tabylǵan múrde men jylqy súıekterine genetıkalyq saraptama jasaldy
"khabar.kz"
