“Memleketke qaıtarsyn”. Nazarbaeva Qulybaev basqaratyn qurylymdy synady

6816
Adyrna.kz Telegram

Senat tóraǵasy Darıǵa Nazarbaeva bızneske beriletin ındýstrıaldy sertıfıkat qyzmetin memleketke qaıtarýdy usyndy dep habarlaıdy Dalanews.kz. 

Parlament otyrysynda elimizdegi jeńil ónerkásip máselesi sóz bolyp, senator Serik Jaqsybekov bızneske beriletin ındýstrıaldy sertıfıkat qyzmetin synady.

“Bylaı qaraǵanda jep-jeńil jumys sekildi. Kompanııa sertıfıkat alý úshin (“Atamekenge” red.) ótinish joldaıdy. Sóıtip 2 aıdan 6 aıǵa deıingi aralyqta álgi ótinishti sarylyp kútedi. Ótinishti qabyldap alǵandar ne habaryn aıtpaıdy, ne jaýabyn joldamaıdy. Tipten túsiniksiz.

Sertıfıkat alýdyń erejesine saı kompanııaǵa sarapshy kelip, baǵalaý jumysyn júrgizý kerek eken.

Sertıfıkatty ótkizip qoıǵan kásiporyn álgi sarapshyny aptalap, aılap kútedi. Onyń qashan, qaı mezgilde keletini habarlanbaıdy. Minekeı, kórip shyǵyńyz…”, – degen Jaqsybekov qolyndaǵy qaǵazdy Nazarbaevaǵa ustatty.

Artynsha Qarjy vıe-mınıstri Berik Sholpanqulov sóz alyp, sertıfıkatty “Atameken” kásipkerler palatasy beretinin eske saldy.

“Ol jaqtaǵylar sizder kótergen máseleden qulaǵdar. Bul jumysty barynsha yqshamdap, júıeleýge tyrysyp jatyr…”, – dedi Sholpanqulov.

Nazarbaeva “Atamekenniń” kásipkerlerge beretin ındýstrıaldy sertıfıkat qyzmetin synap, bul jumysty memleket quziretine qaıtarýdy usyndy.

“Bul isti memleketke júkteý kerek. Jalpy túrli sertıfıkat tabystaıtyn qyzmet túrlerin memleket jaýapkershiligine qaıtarǵan jón. Nege? “Atameken” bul isti ákete almaı otyrǵanyn ózderińiz aıttyńyzdar. Nátıjesi shamaly eken.  Sertıfıkat tabystaýdyń ózin para alyp, para beretin alańqaıǵa aınaldyrypty.

Onyń ústine ındýstrıaldy sertıfıkattar memlekettik tapsyrystyń standartyna saı emes. Munda da jeń ushynan jalǵasqan jemqorlyqty ańǵaramyz. Suraǵanyn berse, álgi sertıfıkatty kim kóringen alýy múmkin.

Jalpy bul saladaǵy bylyq bastan asady. Sertıfıkat berýdi memleketke qaıtaryp, tártip ornatý kerek”, – dedi Darıǵa Nazarbaev.

Indýstrıaldy sertıfıkat kásiporynnyń ónim óndiretinin rastaıtyn qujat. Ótinish berýshiniń tehnıkalyq, tehnologııalyq, resýrstyq múmkindikteri bar ekenin kórsetedi, ónim óndirýge shamasy jetetindigin aıǵaqtaıdy, tizimde kórsetilgen qyzmet aýqymyn  kórsetýge qaýqary jetetinin dáleldeıdi.

Jeńil ónerkásippen aınalysatyn jáne jıhaz ázirleıtin kásipkerlerden memlekettik satyp alýǵa qatysý úshin ındýstrıaldy sertıfıkat talap etiledi.

“Atameken” osy arqyly aty bar, zaty joq kásiporyndarmen kúresetinin aıtqan.

“Biz jeńil ónerkásip ónimderin eksporttaǵannan góri, 17 ese kóp ımporttaımyz.

Qazirgi kezde Qazaqstanda jeńil ónerkásipke kóbinese vedomstvolyq memlekettik tapsyrystar arqyly qoldaý jasalyp otyr, solardyń esebinen kásiporyndar jumysyn jalǵastyrýda. Biraq túrli sebepterge baılanysty bul kásiporyndarǵa tehnologııalyq turǵydan damýǵa, assortımentti keńeıtýge múmkindik bermeıdi.

Memlekettik satyp alýǵa alyp-satarlar kóp qatysady. Tapsyrys berýshi tómen baǵaǵa qyzyǵyp, sapasyz ımporttyq taýar alady. Nátıjesinde bıýdjet qarajaty elden shyǵarylyp, basqa elderdiń ekonomıkasyn damytýǵa demeýshi bolady”, – deıdi óz kezeginde Darıǵa Nazarbaev.

Pikirler