Dáýren Abaev áleýmettik jelidegi Aısultan Rahattyń jazbalaryna qatysty pikir bildirdi

3284
Adyrna.kz Telegram

QR Aqparat jáne qoǵamdyq damý mınıstri Dáýren Abaev áleýmettik jelide kóptiń talqysyna túsken Aısultan Rahattyń jazbalaryna qatysty pikir bildirdi, dep habarlaıdy QazAqparat tilshisi

«Bul másele boıynsha aǵaıynǵa aıtqym keledi, qazir jalpy bizdiń qoǵamda ǵana emes, álem boıynsha ótirik pen shyn aqparatty ajyratý – úlken másele bolyp tur. Keıbir toptar jalǵan aqparat taratyp, úlken kompanııanyń, jeke adamdardyń, tipti bútin bir eldiń abyroıyna nuqsan keltirip júrgenin kórip júrmiz. Biraq onyń artynda jymysqy oı, paıda kórý pıǵyly turady jáne mundaı mysaldar sońǵy ýaqytta bizdiń elde de kóbeıip keledi. Munyń sońy arandap qalýǵa ákelýi múmkin. Aısultanǵa qatysty da osyny aıtqym keledi. Aǵaıyn, bul - birinshi kezekte onyń anasynyń tragedııasy», - dedi Dáýren Abaev «Ashyq dıalog» baǵdarlamasynda.

Mınıstr ana úshin balasynan asqan qymbat adamnyń joqtyǵyn aıtyp ótti.

«Aıtqym keletin taǵy bir mańyzdy dúnıe bar, keıbireýler osy oqıǵaǵa Elbasyn da aralastyrǵysy keledi. Shý jasap, eldi dúrliktirýge tyrysady. Biraq halyqtyń baǵyna týǵan jaqsymyzdy qańqý sózge qalaı qııamyz? Ózińiz oılańyzshy, ekonomıkasy quldyraǵan, óndirisi toqtaǵan eldi 30 jylda qazirgideı deńgeıge kóterý – kimniń qolynan keledi. Qazaq qashan da eli úshin erlerdi baǵalaǵan, tóbesine kótergen, abyroıyn saqtaǵan. Babalarymyz aıtqandaı «betege ketse bel qalar, berekeń ketse neń qalar?» Aǵaıyn, sondyqtan berekemizdi baǵalaıyq. Jel sózge erip, jaqsy isti joqqa shyǵarmaıyq», - dedi Dáýren Abaev.

 

Pikirler