Israıl Saparbaı: Teńizdi jut! Muhıtty, munaıdy jut!

Ókinbeımin bireýdi ópseń de ólip,
Ókinbeımin bireýge ketseń de erip.
Jazmyshtyń maǵan jazǵan pendesine
Men-daǵy kezigermin kóp sendelip.

Muń ba eken,
Munyń bári ýaıym ba eken?!
Búginde oıym bóten, jaıym bóten.
Qoınyna qona almaǵan qos aqqýǵa
Qol bulǵap qala berer – qaıyń meken…

Jabyqpa,
jarylqasyn betińdi aldan.
Ótken kún óshken, kóshken sekildi arman…
Bolar-aý bári de umyt,
Amalym ne,
Aıaımyn mahabbatty jetim qalǵan.

Kógenge kózi kónbegen,
Kókireginde shamy sónbegen,
Iriden izet kóre almaı
Irigen ishi shermenen,
Sanasy samsoz júrse de
Sanatqa, sanǵa enbegen,
Asyl bir týǵan aqyndy
Qaı kezde qaıǵy jeńbegen?..
Arǵymaq asaý baptaǵan,
Aldynan eshkim qaqpaǵan.
Armannyń qusyn álpeshtep,
Allanyń isin jaqtaǵan,
Altynmen aryn aptaǵan,
Ananyń sútin aqtaǵan –
Asyp bir týǵan Aqyndy
Qaı kezde ajal tappaǵan?...
Jaı ustap týǵan jatyrdan,
Ashynsa – ashý shaqyrǵan,
Shaldýarlarǵa shart synba,
Aldııarlarǵa aqylman,
Bándáýı myna tirlikke
Bádáýı basyn qatyrǵan –
Zalalsyz, zilsiz Aqynǵa
Qaı zaman balyn tatyrǵan?!
Ayny tatyp ushynǵan,
Táttini tatyp tushynǵan,
Uıaǵa tuqym túsirip,
Qııaǵa tuıǵyn ushyrǵan,
Minájat keship ár juma
Tárjima tartqan Mysyrdan...
Baıbatsha kóńil Aqynǵa
Qaı patsha taǵyn usynǵan?
Eljirep esik ashpaǵan
Talaıǵa táńr – tas qamal.
Shaıyrǵa zaıyr kimiń bar
Taǵdyrǵa talaq tastaǵan?
Tútini birge demeseń,
Bitimi bólek basqadan,
Qaıraǵan tisin Aqynǵa
Qaı nadan ıtin qospaǵan?...

Sana syrqaty nemese Buqarǵa elikteý

Sóz salar sabaz tappaı Sabalaqqa,
Janarym jaýtańdaıdy jamaǵatqa.
Siresip ákim otyr «átkenshekte»,
Syra iship aqyn otyr saıabaqta.
Qarabaı qamshy úıirip Qanaǵatqa,
Atymtaı adasyp júr Dala jaqta.
Juldyzym juldyz emes, Aına-kókte
Aınalyp ketken bilem qara daqqa...

Jabysyp jarym túnde jaraý atqa
Qaraqshy qarasha úıdi tonamaq pa?..
Qaratal saýsaqtaryn tarbıtady
Qap-qara juldyzdardy sanamaqqa.
Qasynda qaraılaıtyn bala joqta,
Qara shal qarǵys aıtar qaǵanatqa.
Qarasha úı,
Qara qorym,
Qaıra n, aýyl
Qaraıdy qamkóńilmen qala jaqqa.
Qanatyn jaıyp bir qus bar alapqa,
Tarapqa tamuq túni taramaq pa?...
Qap taýyn qara bult jaılap alyp,
Qaǵbany qara tuman ormaq pa?...
Qudaıym buıyrmaǵan jamanatqa–
Jaı tústi jazataıym mana baqqa...
Aqqýdyń qaýyrsyn kókte qalqyp,
Qarǵalar qarq-qarq kúler jaǵa jaqta.
Shalqýǵa, shalqaıýǵa shama joqta,
Paqyrǵa, Haq taǵala, tabalatpa.
Qalqaıǵan qara bastan qandaı qaıyr,
Qasyńda qaýqyldasar qara joqta?!
Qaıdaǵy qaǵylǵan oı qaraqatpa
Qaıtesiń qamap, qanap bara jatsa?
Qaraıtyn qatynǵa da bet qalmady
Taýsylǵan appaq uny qara qapsha.
Besikte beli bekem bala joqta
Esikten Qydyr baba qaramaq pa?..
Oshaqta oınap jatyr ot pen jalyn,
Qazanda qaınap jatyr qara botqa.
Sabylyp soqa basym san alapqa,
Sazandaı aýnaqshıdy sanam otta...
Búıregim búlk etpeıtin bolyp aldy
Ǵaıypqa,
Ǵajaıypqa,
Ǵalamatqa....
Aınalyp jazǵan basym ala dopqa,
Taǵdyrym tańylǵandaı taǵaly atqa.
Atsań oq, aıtsań sóziń ótpeıtuǵyn,
Shynymen bul shirkinge shara joq pa?

Meniń muńym tek qana meniń qaıǵym emes qoı,
Qalǵyp ketken qaımana – qańǵyp júrgen
Elesteı...
Kóshti qalaı túzermin,
Esti qalaı jııarmyn,
Oń jaǵymnan jel espeı,
Sol jaǵymnan el óspeı?

“Betegeden bıikpin, alasamyn jýsannan”...
Kórine me kókjıek kóz súzgenmen qur shańnan?
Alarmannyń súleıi,
Berermenniń úreıi –
Aqyn qaıda býsanǵan?!
Batyr qaıda qursanǵan?!

Jańa týǵan jas bala...
Kirpııaz ba, kim ózi?
Kimge yrys, kimge qut kindigimniń
Kinázi?
Aýyzdyǵyn shaınaǵan Arǵymaǵym bolmasa,
Kimge kerek qazaqtyń qoıdaı qońyr minezi?

Zaman mynaý apshynǵan aıdahardaı jalanyp,
Ne bolmaqshy qaptasa Qaraspandy qara bult?..
Qam-qapersiz basyma qaıta oralmas kún kelse,
Qasqyr basym qanshyqqa qalmaımyn ba talanyp?..

Erke minez ez emes,
Erkek tekti el em ǵoı?!.
Eki kózim telmirdi-aý esik jaqqa eleńdeı...
Kókbórim-aý,
Kóp-kórim qýardy ma bókteriń,
Bóriktirgen kim seni?
Túske júrsiń nege enbeı?

...Meniń qaıǵym tek qana meniń muńym emes qoı?!
Qalǵyp ketken qaımana – qańǵyp júrgen elesteı...
Kóshti qalaı túzermin,
Esti qalaı jııarmyn,
Oń jaǵymnan jel espeı,
Sol jaǵymnan el óspeı?!