Qyzylorda oblysy Tasbóget kentinde turatyn Kózdibaevtar áýleti jańa jyl merekesi qarsańynda taǵy da bir janǵa tolyqty. Jasy áli otyzǵa jetpegen Dınara Aıajan esimdi jetinshi nárestesin qushaǵyna alǵan dep jazady baq.kz Aqmeshit aptalyǵyna silteme jasap.
Úlken ómirge 17 jasynda qadam basqan Dınara búginde Ábdinur, Jansezim, Rústem, Jannur, Damır, Arýjan, Aıajan esimdi balaqaılardyń anasy.
“Joldasym Rınat ekeýmizdiń otaý qurǵanymyzǵa bıyl 10 jyl tolady. Ata-enemizben birge 11 jan bir shańyraq astynda tatý-tátti ǵumyr keship kelemiz. Balalarymnyń sanyn aıtyp eshqashan kópsingen emespin. Laıym, Qudaıym kóp kórmesin”, – dep bastady áńgimesin ol.
Bir qyzyǵy, Dınaranyń úlken enesi dúnıeden ozar aldynda bosaǵadan jańa attaǵan jas kelinine yrym etip, óziniń kúmis alqasyn syıǵa tartypty. Ómirinde 9 qursaq kóterip, ulyn uıaǵa, qyzyn qııaǵa qondyrǵan keıýana jolymdy bersin dep osylaı bata berip ketken kórinedi. Kelininiń de sol izdi úzbeı jalǵap kele jatqanyn óziniń enesi Kabıra rızashylyqpen aıtty.
«Qudaıdyń bermegenin tartyp ala almaısyń» degen. Men bir bala ǵana súıgen janmyn. Esesine, Qudaıǵa shúkir, jalǵyz balamnan taraǵan nemerelerimniń qyzyǵyna toımaı kelemin. Úlken enem syrqattanyp, fánı dúnıeden óter aldynda nemeresi Rınatty úılendirip, kelinine óz qolymen kúmis alqasyn bergeni bar edi. Dınara ájesiniń sol úmitin aqtady”, – dedi Kabıra apa.
Al memlekettiń beretin kúmis alqasyna Dınara osy qańtar aıynda qol jetkizbekshi. Asyp-tasqan turmys bolmasa da, nesibesi ortaımaǵan qarapaıym otbasy baqyttyń kiltin balalarynda dep biledi. Bul otbasynyń asyraýshysy Rınat elektrık bolyp jumys jasaıdy. Al, balalardyń tárbıesimen tikeleı úıdiń aqylshysy Kabıra apa aınalysady eken.
Sóz sońynda jas ana bala sanyń 10-ǵa jetkizý oıynda bar ekenin de jasyrmady.
"Aqmeshit" aptalyǵy
