Dúnıejúzilik densaýlyq saqtaý uıymy (DDSU) koronavırýstyń taralýyna baılanysty halyqaralyq deńgeıde tótenshe jaǵdaı jarııalady. Degenmen uıym basshysy Tedros Gebreıesýs halyqaralyq is-saparlar men saýdaǵa shekteý qoıýǵa negiz joq dedi.
Qytaıdan tys aýmaqta vırýsty juqtyrǵandar sany 100-ge jetti. 18 elden vırýs tabylǵan. Qytaıdyń ózinde vırýsty juqtyrǵandar sany on myńǵa jýyqtap, keminde 213 adam ólgen. 12 myńnan astam adamnan koronavırýs belgilerin izdep jatyr.
Birneshe qalada karantın jarııalanyp, jabyldy. Onda barlyǵy 60 mıllıon adam turady. Qytaı dárigerleriniń aıtýynsha, vırýsqa qarsy ekpeni synaqtan ótkizý úshin keminde úsh aı kerek.
2009 jyldan beri DDSU osymen altynshy ret halyqaralyq deńgeıde tótenshe jaǵdaı jarııalap otyr. Sońǵy ret uıym 2019 jyly Kongo demokratııalyq respýblıkasynda Ebolanyń jappaı taralýyna baılanysty osyǵan uqsas málimdeme jasaǵan. 2020 jyldyń qańtar aıyndaǵy derek boıynsha, bul aýrýdan 2236 adam ólgen.
30 qańtarda Qazaqstandaǵy jaǵdaıdy baıandaǵan densaýlyq saqtaý mınıstri Eljan Birtanov 38 adamnan koronavırýs belgilerin izdep jatyr, olar aýrýhanada jatyr dep málimdedi
"Azattyq" radıosy
