21 qańtarda tústen keıin Nur-Sultanda "Astana Opera" teatrynyń aldyna 40-50 shaqty áıel jınalyp, prezıdent Qasym-Jomart Toqaevtyń shyǵýyn talap etti. Múgedek bala tárbıelep otyrǵan analardyń basty talaby - baspana máselesin sheship berý. Olar "úkimet ári qaraı jeke menshikke ótkizip, satyp alatyndaı baspanamen qamtamasyz etsin" deıdi.
Jınalǵandardyń keıbiriniń qolynda "Múgedek balalarǵa baspana berilsin!", "Múgedek baslaǵa baspana kerek" degen jazýy bar plakattar boldy. Olar "Toqaev!" dep aıqaılady.
Búgin saǵat 15:00-de "Astana Opera" teatrynda ótetin Abaıdyń 175 jyldyǵynyń ashylýyna prezıdent Qasym-Jomart Toqaev qatysady dep aıtylǵan edi. Analar prezıdenttiń ǵımarattan shyǵyp, analardyń suraqtaryna jaýap bergenin qalaıdy. Degenmen prezıdenttiń ashylýǵa kelgeni-kelmegeni belgisiz.
Áıelder "mınıstrlikke baryp, kezdesý ótkizý týraly usynysty qabyldaǵan joq". Olar "bıliktiń ýádesinen mezi bolǵanyn" aıtady. Olardy teatr ǵımaratynyń syrtynda omon jasaqtary bógep, ári qaraı ótkizbeı tur.
Oqıǵa ornynda júrgen Azattyq tilshisiniń habarlaýynsha, munda 40-50 shaqty arnaıy jasaq ókili bar jáne alty avtobýs tur.
- Qyzym ekinshi top múgedegi. Baspana kezegine 2014 jyly turǵanmyn. Mine, áli júrmiz. Jumys istemeımiz. Ekeýimiz ǵana turamyz. Jalǵyzbasty anamyn. Kúıeýim qaıtys bolyp ketken. Baspana máselesin aıtyp, barmaǵan jer, baspaǵan taýymyz qalmady. Balam 23-te. Járdemaqy almaımyn. Buǵan deıin baryp edim, úsh aılyq zeınetaqyny eseptedi de, 47 myń teńge sizge jetedi dep aıtty. Páter jaldap turamyz. Balalarymdy qaraý kerek. Erkin qozǵala almaıdy, sóıleı almaıdy. Aı saıyn 30 myń teńge tóleımiz. Buǵan qosa, jaryqty tóleý kerek. 47 myń teńge nege jetedi? - dedi Jaqsygúl Asanova esimdi turǵyn Azattyq tilshisine.
"Azattyq" radıosy
