Máselen, Jambyl aýdany, Asa aýylynyń turǵyny Dınara Bıbazarova osydan 3 jyl buryn «Jumyspen qamtý – 2020» memlekettik baǵdarlamasy arqyly «Aýyl sharýashylyǵyn qoldaý qory» akıonerlik qoǵamynyń oblystaǵy fılıalynan 6 mıllıon teńge nesıe alyp, ol qarjyǵa 18 sıyr satyp alǵan edi. Ol bastapqyda qandaı kásippen aınalysýǵa bolatynyn ábden zerdelep, aqyry aýyl sharýashylyǵymen aınalysýǵa bel býǵan eken. Dese de nesıege qol jetkizý óte uzaq merzimge ulasatynyn, ekiniń biri memlekettik qoldaýǵa ıe bola bermeıtinin ózgelerden estigende kóńili sý sepkendeı basylǵan kórinedi. Alaıda kásippen aınalysýǵa degen yntasy onyń úıde bekerge qarap otyrýyna erik bermegen.
– Nesıe alý úshin qaptaǵan qujat jınaýdan sharshaıtyn, ár mekemege bir sabylyp, orta jolǵa kelgende qolyn bir-aq siltep, alǵan baǵytynan keri sheginetin adam men emes. Men ózime «óz aldyńa bir isti bastaýǵa nazaryń aýdy ma, endeshe, sol isti sońyna deıin jetkiz» degen bıik maqsat qoıdym. Mine, sonyń arqasynda qazir óz isimdi dóńgeletip otyrmyn. Osy rette memlekettiń kómegine, aýdandyq jumyspen qamtý ortalyǵynyń mamandaryna aıtar alǵysym sheksiz.
Jalpy mal sharýashylyǵymen aınalysatyn adam satylatyn maldyń baǵasyna emes, onyń deni saý bolýyna, barǵan jerin jersine alatyn artyqshylyǵyna qaraý kerek. Sharýashylyǵyń sút baǵytynda bolsa sútti, et baǵytynda bolsa etti mal alýǵa basymdyq berilýi qajet. Óıtkeni men áıel adam bolǵandyqtan, kúıeýim men enem kúndiz jumysta júrgendikten, mal-janǵa qaraý ózime júktelip, istiń kózin tabý ońaı bolǵan joq. Sıyrdy satyp alǵan jyly 5-eýi belgisiz jaǵdaıda ólip, aıtarlyqtaı shyǵynǵa battyq. Degenmen qalǵanyn baǵyp-qaǵý, jemshóp úshin tyǵyryqtan shyǵýdyń jolyn kúıeýim Narıman ekeýmiz birge qarastyrdyq. Shynyn aıtqanda, birazyn bordaqylap sattyq. O bastaǵy maqsatym da iri qaranyń basyn tóli esebinen kóbeıtý bolǵan edi. Alaıda múıizdi iri qaranyń keıbirin bordaqylap satyp, odan túsken qarjyny nesıeni jabýǵa, saýyn sıyrlardyń jemshóbin alýǵa, satylǵan maldyń ornyn toltyrýǵa jumsaý arqyly tyǵyryqtan shyqtyq. Búginde sıyrlarymnyń esebi túgel. Kúnine eki mezgil 5-6 sıyr saýamyn. Ózim ashqan «Aıarý» jeke kásipkerligi qazir Asa aýylyna qarasty balabaqshalar men birqtar aýyl turǵyndaryn sıyr sútimen qamtamasyz etip otyrǵan jaıy bar,– deıdi Dınara Sheralyqyzy.
Jambyl aýdandyq jumyspen qamtý ortalyǵynyń dırektory Asqar Janqorazov buryn kásiptiń násibin kórem degen azamattarǵa «Jumyspen qamtý – 2020» baǵdarlamasy úlken demeý bolyp kelse, 2017 jyldan beri bul baǵdarlamanyń ornyn «Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan» «Eńbek» memlekettik baǵdarlamasy almastyrǵanyn aıtady.
– Bul baǵdarlama aýdanymyzda júıeli túrde júzege asyrylýda. Máselen, shaǵyn nesıe alyp, kásibin dóńgeletemin degenderge qazirde aıryqsha qoldaý kóp. Bıylǵy jyldyń jartyjyldyǵynyń ózinde 74 adam shaǵyn nesıemen qamtamasyz etildi. Olardyń 70-i nesıege «Aýyl sharýashylyǵyn qoldaý qory» akıonerlik qoǵamy arqyly qol jetkizse, qalǵany «Atameken– Taraz» shaǵyn nesıe uıymynan aldy, – deıdi A.Janqorazov.
Bıyl memleketten shaǵyn nesıe alyp, oǵan saýyndy sıyr satyp alǵandardyń biri – atalǵan aýyl turǵyny «Shadııar» jeke kásipkerliginiń ıesi Jubanysh Aınııazov. Ol da «Aýyl sharýashylyǵyn qoldaý qory» akıonerlik qoǵamynyń oblystaǵy fılıaly arqyly 4 mıllıon teńge alyp, oǵan 14 sıyr satyp alypty.
– Nesıeni 6 paıyzben 5 jylǵa aldym. 14 múıizdi iri qaranyń beseýi saýyn sıyr. Ony aýyldaǵy úıde qolda ustap otyrmyn, qalǵanyn bir sharýa qojalyqpen kelisip, aqyǵa baqtyryp otyrmyn. Mal sharýashylyǵymen aınalysýyma aýyldastarymnyń isi arqaý boldy. Naqty aıtqanda, burynnan azyq-túlik satatyn dúkenim bar edi. Dúkenime úıinde bir-eki sıyr ustap otyrǵan kórshilerim saýyp otyrǵan sıyr sútiniń ózderinen artylǵanyn ákelip qoıyp júrdi. Al ol sútti kelgenin kelgenindeı tutynýshylar talap áketetin. Osy jaıttar kóz aldymda bolyp jatqan soń, nesıege bolsa da sıyr alyp, sútin satýǵa bel býdym. Qazirgi tańda kúnine saýylǵan 25-30 lıtr súttiń ár lıtrin 130 teńgeden ótkerýdemin. Tabysymyz ózimizge jetedi. Aldaǵy ýaqytta qosymsha jumysshylardyń kómegimen mal sharýashylyǵynyń órisin keńeıtip, óz aldyna aýyl syrtynan sharýashylyq ashsam degen oıym bar, – deıdi Jubanysh Qýanyshbaıuly.
«ADYRNA»
ulttyq portaly
