Eńbek mıgranttarynyń mıllıardtary elde qalýy kerek 

2600
Adyrna.kz Telegram

Búgin Májilis depýtaty Berik Dúısembınov elimizde jumyssyzdyq joq ekenin, tek bul salanyń tıimsiz basqarylyp otyrǵanyn aıtty. QR Premer-Mınıstri A.U.Mamınge joldaǵan depýtattyq saýalynda ol elimizge zańsyz kelip jatqan mıgranttardyń sany jumyssyzdardyń sanynan asyp otyrǵanyn eskerdi. 

Qazaqstan Respýblıkasynyń eńbek mınıstrligi kelesi jylǵa sheteldik jumys kúshin tartý kvotalaryn josparlaı otyryp, osy kvotany eki ese qysqartatyndyǵyn jarııalady. Mınıstrdiń aıtýynsha, bul sharalar eldiń ishki eńbek naryǵyn qorǵaý maqsatynda jasalyp otyr.

Sonymen qatar, 2019 jyly sheteldik jumys kúshin shaqyrý kvotasy 49 myń adamdy quraǵan. Biraq, 2019 jyldyń 1 qazanyndaǵy aqparat boıynsha Qazaqstanda sheteldik jumys kúshin shaqyrýǵa berilgen ruqsattardyń resmı sany 21 myńǵa da jetpeıdi. 

Resmı málimetterge sáıkes, Qazaqstanda sheteldik jumys kúshin shaqyrýshy 2396 jumys berýshi kásiporyndar tirkelipti. 

Alaıda, resmı statıstıka men Qazaqstanǵa kelip, nan taýyp júrgen sheteldik jumysshylardyń naqty sanynyń aıyrmashylyǵy jer men kókteı ekendigi bárimizge málim. 

Mysaly, Kóshi-qon komıtetiniń málimetterine sáıkes, 2018 jyly Qazaqstanǵa Ózbekstan men Tájikstannan 551 myń eńbek mıgranttary kelse, 2019 jyly bul kórsetkish 600 myńnan asady dep boljanyp otyr. 

Biraq, bul  mıgranttardyń sany Eńbek mınıstrliginiń sheteldik jumys kúshi kvotasy boıynsha esebinde eskerilmeıdi. Sondaı-aq, shetel azamattarynyń  Qazaqstannan syrtqa qansha qarjy shyǵarǵandary jóninde de eshbir resmı aqparat joq. 

Joǵaryda keltirilgen eńbek mıgranttarynyń sanyna salyp eseptesek, shetel asqan qarajat kólemi mıllıardtap esepteledi,al bul qarjy Qazaqstan azamattarynyń jalaqysy bolyp  elimizdiń ekonomıkasynda qalar edi.

Sonymen qatar, Statıstıka komıtetiniń málimetterine sáıkes, el  ishindegi jasyryn jumyssyzdyqty eseptemegende, jumyssyz azamattardyń sany 440 myń adamnan asqan. 

«Bundaı jaǵdaı, ýákiletti memlekettik organdar tarapynan eńbek naryǵynyń ahýalyna jetkiliksiz kóńil aýdarǵanynan týyndap otyr dep esepteımiz. Ózimizdiń 440 myń azamatymyz jumyssyz otyrǵanda, myńdaǵan sheteldik eńbek mıgranttary olardyń ornyn basyp otyr» -  dedi «Aq jol» frakııasynyń depýtaty B.Dúısembınov.

Osyǵan baılanysty Úkimetten: 

  • Memlekettik organdarǵa, sheteldik jumys kúshin shaqyrý boıynsha resmı esepterinde eńbek mıgranttarynyń naqty sanyn eskerýlerin tapsyrýyn;
  • Sheteldik eńbek mıgranttary Qazaqstannan shyǵarǵan qarajat kólemi týraly tolyq aqparat berýińizdi ótinedi, sebebi bul jalaqyny qazaqstandyqtardyń ózderi alyp, shetelge shyǵarmaı el ekonomıkasyna quıýy tıis edi. 
  • Qarapaıym azamattardyń jalaqysyn kóterý maqsatynda,  shaǵyn jáne orta bıznestiń eńbek aqy qoryna salynatyn júktemeni azaıtý men basqa stımýldardy  qarastyrýyn surady.   

 "Adyrna" ulttyq portaly                  

 

Pikirler