Mınıstrlik Aqjarqyn Turlybaıdy ekstradıııalaý týraly aıtty

3803
Adyrna.kz Telegram

Syrtqy ister mınıstriniń birinshi orynbasary Shahrat Nuryshev Aqjarqyn Turlybaıdy elge qaıtarý tártibin túsindirdi

Syrtqy ister mınıstrligi Qytaıda esirtki kontrabandasy úshin ustalǵan Aqjarqyn Turlybaıdy elge qaıtarý máselesin túsindirdi, dep habarlaıdy Sputnik Qazaqstan tilshisi.

Mınıstrdiń birinshi orynbasary Shahrat Nuryshevtiń aıtýynsha, sottyń sońǵy sheshimi áli shyqqan joq. Onsyz Aqjarqyn Turlybaıdy ekstradıııalaýǵa suraý salý múmkin emes.

"Sottyń sońǵy otyrysy qyrkúıek aıynda bolǵan. Biraq sheshim áli shyqqan joq. Biz sony kútip otyrmyz. Sottyń sheshimi shyqqannan keıin ekstradıııalaýǵa bolady. Tártip boıynsha onyń týǵan-týystary bas prokýratýraǵa Aqjarqyndy ekstradıııalaý týraly ótinishhat joldaıdy. Sonyń negizinde bas prokýratýra Qytaıdaǵy kontr áriptesterge suraý salady. Olar óz kezeginde sottalǵan adamdy bere me, joq pa, ózderi sheshedi. Oń sheshim bolsa, ekstradıııa jasalady", - dedi Nuryshev Sputnik Qazaqstan tilshisine bergen suqbatynda.

Onyń sózine qaraǵanda, Aqjarqyn Turlybaı elge qaıtarylǵannan keıin onyń isin Qazaqstannyń soty qaraıdy. Sebebi eki eldiń zańnamasy eki bólek jáne qylmys úshin beriletin jaza ártúrli.

"Iá, jazanyń merzimi ózgerýi múmkin. Sebebi Qazaqstan men Qytaıdyń zańnamasy bir-birine uqsamaıdy. Bir qylmys úshin ártúrli jaza beriledi. Sondyqtan bul jerde ol óz jazasyn Qazaqstannyń zańnamasy boıynsha óteýi tıis", - dep atap kórsetti Nuryshev.

Aqjarqyn Turlybaıdyń taǵdyry

Qazaqstan azamaty Aqjarqyn Turlybaı 2014 jyly naýryzda Gýanchjoý áýejaıynda ustalǵan bolatyn. Oǵan shekaradan 4,5 keli esirtkini alyp ótpek boldy degen aıyp taǵyldy. Ol kezde otandasymyz 20 jasta bolǵan edi. 2015 jyldyń maýsymynda Qytaı soty ony ómir boıyna bas bostandyǵynan aıyrdy. Sotta Aqjarqyn sheteldik dosy aldap ketkenin aıtyp, kinásin moıyndaǵan joq.

2016 jyly sot sheshimi joıylyp, is qaıta qaraýǵa jiberildi.Bıyl 3 qyrkúıekte Qytaıdyń Gýanchjoý qalalyq sotynda Aqjarqyn Turlybaıdyń isi boıynsha otyrys ótti. Sot otyrysy 2 saǵattan astam ýaqyt boldy. Aqjarqyn Turlybaı qytaı tilinde jaýap berip otyrdy.

Al 9 qyrkúıekte otandasymyzdyń anasy Zýhra Seıtimova Qazaqstan prezıdentine kómek surap hat jazǵany habarlandy. Artynsha Qasym-Jomart Toqaev Qytaıǵa sapary kezinde Aqjarqyn Turlybaıdyń máselesin kóterdi.

Aqjarqyn túrmede nemen aınalysady

Qazaqstannyń Qytaıdaǵy elshiliginiń málimetine súıensek, Turlybaı qasyndaǵy sottalǵandarǵa aǵylshyn tilin úıretip júr.

Syrtqy ister mınıstrligi Sputnik Qazaqstan saýalyna bergen resmı jaýabynda Aqjarqyn Turlybaı kórkem ádebıet oqıtynyn aıtty. Dene shynyqtyrýmen de aınalysady. Qytaı tilin jaqsy meńgerip alǵan. Túzetý mekemesindegi jaǵdaıǵa qatysty shaǵymy joq eken.

Qazaqstannyń Qytaıdaǵy elshiliginiń qyzmetkerleri Gýanchjoýdaǵy túrmege baryp, Turlybaıdyń qal-jaǵdaıyn bilip turady. Buǵan qosa, aqshalaı kómek kórsetip, suraǵan kitaptaryn taýyp beredi.

 

Pikirler