"Adam basyna aıaǵyn qoıyp, fotoǵa tústi": Sırııadan ákelingender soty bastaldy

738

Sırııadan qaıtarylǵan qazaqstandyq terrorıstik uıym músheleriniń bári ólgen adamdarmen foto men vıdeoǵa túsetinin aıtady.

 Astanadaǵy sotta IGIL*-dyń quramynda bolǵan 14 qazaqstandyqtyń isi qaralyp jatyr. 33 jastaǵy sottalýshy Amanjol Janseńgirov birinshi bolyp jaýap berdi. Ol prokýrordyń dáıekterine jaýap berdi, dep habarlaıdy Sputnik Qazaqstan tilshisi.

Túske deıingi otyrysta prokýror Edil Murat sottalýshylardyń Sırııadaǵy áreketteri jaıynda aıta kele, qarýly qaqtyǵystan keıingi bir jaǵdaıdy mysalǵa keltirdi. IGIL* terrorıstik uıymynyń músheleri jeńiliske ushyraǵan tórt adamnyń basyn kesip tastap, qala kósheleriniń birine jurt úreıin týdyrý maqsatynda jeti táýlikke tastap ketken.

"Terrorıstik top múshesi Janseńgirov osy bastardyń janynda turyp, onyń birin aıaǵymen basyp, qolyna atys qarýyn ustap turyp, sýretke túsken. Ol sýret ǵalamtor arqyly kópshilikke tarap ketken", - dedi prokýror.

Tústen keıingi otyrysta Amanjol Janseńgirov óz áreketin túsindirdi. Onyń sózine qaraǵanda, terrorıstik toptyń serkeleri jańa múshelerdi ádeıi vıdeo men fotoǵa túsirip otyrǵan. Sóıtip, óz eline qaıtpasyn dep, ǵalamtorǵa júktep júrdi. Al vıdeo men fotoǵa túsýden bas tartatyndardy birden "tyńshy" dep, atý jazasyna kesken. Kóbisi óz balalary men áıelderi úshin qoryqqan. Sol sebepti foto-vıdeoǵa túsýge májbúr boldy.

"Sol kúngi qaqtyǵystan keıin kóp adam turyp, fotoǵa túsip jatty. Kóp adam turǵasyn, men de bardym. Ol jerdiń mentalıteti sondaı, barlyǵy ólgen adamdarmen foto men vıdeoǵa túsedi. Meniń qasymda áskerı ámir Sad boldy. Ol maǵan endi baryp sen tús dedi. "Nege?" dedim. Men seniń áskerı ámirińmin dep jaýap berdi. Aıtqanymdy tyńda, bar tur dedi. Men turdym. Sosyn aıaǵyńdy qoı dedi. Aıaǵymdy qoıdym. Qolyńdy kóter de, kúl dedi. Biraq men ol fotony ınternetke salǵan emespin. Olar óz telefondaryna túsirdi, artynan óshiremiz dedi", - dedi Janseńgirov.

 

Pikirler