Türkiia Ūly Ūlttyq Mäjılısınıŋ töraǧasy Numan Kurtulmuştyŋ şaqyruymen Erlan Qoşanov bastaǧan bır top Mäjılıs deputaty Türkiia Respublikasyna resmi saparmen bardy. Ankara qalasynda deputattar Parlament basşylyǧymen kezdesıp, ekı el arasyndaǧy strategiialyq ärıptestık pen parlamentaralyq qarym-qatynasty damytu mäselelerın talqylady.
Numan Kurtulmuşpen kezdesude Mäjılıs töraǧasy ärıptesın Türkiia Ūly Ūlttyq Mäjılısınıŋ 105 jyldyǧymen jäne Ūlttyq egemendık künımen qūttyqtady.
Erlan Qoşanov jüz jylda Türkiianyŋ ǧalamat jetıstıkterge qol jetkızgenın atap ötıp, qos memlekettıŋ arasynda şynaiy dostyq pen tuystyq bailanysqa negızdelgen berık yntymaqtastyq ornaǧanyna airyqşa nazar audardy.
– Memleketterımızdıŋ arasyndaǧy qarym-qatynas erekşe jaqyn der edım. Būl jaqyndyǧymyzdy ekı el köşbasşylary arasyndaǧy bauyrlyq bailanystan-aq aŋǧaruǧa bolady. Prezidentterımızdıŋ arasynda myzǧymas dostyq, syilastyq bailanys bar. Olar öte jiı kezdesıp tūrady. Är kezdesuı yntymaqtastyqty tereŋdetuge zor serpın beredı. Däl osyndai dostyq qarym-qatynas Parlament deŋgeiınde de qalyptasty. Alda bız öz tarapymyzdan ekı el basşylarynyŋ uaǧdalastyqtaryn zaŋnamalyq tūrǧyda jüzege asyratyn bolamyz, – dedı Palata spikerı.
Parlamentaralyq yntymaqtastyqtyŋ perspektivalary äŋgımenıŋ özegıne ainaldy. Būl rette taraptar zaŋ şyǧaru baǧytyndaǧy bailanysty tereŋdetuge kelıstı.
– Bızdıŋ deputattarymyz da bır-bırımen jiı kezdesıp tūrady. Parlament – halyq ökılderı jinalatyn oryn. Sondyqtan bız halyqtyŋ ökılderı retınde ekı eldıŋ tyǧyz aralasuyna, jaqyndasuyna jol aşamyz. Parlamenttık diplomatiianyŋ missiiasy da osy. Bır-bırımızden üirenetın tūstarymyz az emes. Bız Türkiiamen parlamentaralyq serıktestıktı odan ärı nyǧaituǧa müddelımız, – dedı Mäjılıs spikerı.
Taraptar köpjaqty formatta da yqpaldastyqty tereŋdetuge qyzyǧuşylyq tanytyp otyr. Būl rette Türkı memleketterı Parlamenttık Assambleiasy aiasyndaǧy jūmysqa erekşe män berıledı. Atalǧan ūiymǧa töraǧalyq biyl Qazaqstanǧa ötedı. 11-12 mausymda Astanada TÜRKPA-nyŋ otyrysy josparlanuda. Oǧan türık tarapy qatysatynyn aitty.
Türkiia Ūly Ūlttyq Mäjılısınıŋ töraǧasy öz sözınde qazaq-türık yntymaqtastyǧy barlyq salada qarqyndy dami beretının atap öttı.
– Bız Qazaqstannyŋ är jetıstıgıne şyn quanamyz. Byltyr Qazaqstanda resmi saparmen boldym. Prezident Qasym-Jomart Toqaevpen jäne Özıŋızben ötken kezdesulerde ekı el arasynda bailanysty odan ärı jetıldıruge yqpal etetın maŋyzdy taqyryptardy talqyladyq. Bügın sol äŋgımenı jalǧastyryp jatyrmyz. Bız dostyq toptarymyzdyŋ jäne halyqaralyq ūiymdardyŋ aiasynda bırlesken jūmysty nyǧaitatyn bolamyz, – dedı Numan Kurtulmuş.
Memleketaralyq qatynastardy damytuda partiiaaralyq bailanystyŋ da maŋyzy zor. Qos tarap būl salada da jūmysty ılgerıletuge daiyn ekenın jetkızdı.
Būdan bölek, sauda-ekonomika, auyl şaruaşylyǧy, äskeri-tehnikalyq saladaǧy serıktestık mäselelerı ortaǧa salyndy. Mädeni-gumanitarlyq qatynasty tereŋdetu jaiy da keŋınen söz boldy.
Sapar barysynda delegasiia müşelerı Atatürık kesenesıne gül şoqtaryn qoiu räsımıne qatysyp, Mūstafa Kemal Atatürıktıŋ ruhyna taǧzym ettı. Mäjılıs spikerı qūrmet kıtabyna jazba qaldyryp, Täuelsızdık soǧysy mūrajaiyn jäne Prezident janyndaǧy Ūlt Kıtaphanasyn aralady.
