13 säuır, jeksenbı künı taŋerteŋ Resei äskerı Ukrainadaǧy Sumy qalasyna ballistikalyq zymyrandarmen soqqy jasady, dep habarlaidy "Adyrna" ūlttyq portaly.
Būl turaly jergılıktı bilık pen Ukraina prezidentı Vladimir Zelenskii özınıŋ X äleumettık jelısındegı paraqşasynda jazdy.
Qala äkımı mındetın atqaruşy Artem Kobzardyŋ aituynşa, şabuyl saldarynan 20 adam qaza tapqan.
Ukraina ışkı ıster ministrı İgor Klimenkonyŋ mälımetınşe, qaza tapqandar sany – 21 adam. Taǧy 83 adam jaraqat aldy, olardyŋ arasynda jetı bala bar.
Zelenskii qaza tapqan jäne jaralanǧan beibıt tūrǧyndar ondaǧan adamǧa jetedı dep mälımdedı.
"Sumy qalasyna ballistikalyq zymyranmen jasalǧan sūmdyq soqqy. Jaudyŋ zymyrandary jai ǧana qalalyq köşege, beibıt ömırge soqqy berdı: tūrǧyn üiler, bılım beru mekemelerı, kölıkter... Būl – adamdar şırkeuge baratyn künı boldy", – dep jazdy ol.
"Mūndai ärekettı tek sūmyrai ǧana ıstei alady. Kädımgı adamdardyŋ ömırın qiyp jatyr. Qaitys bolǧandardyŋ tuystary men jaqyndaryna qaiǧyryp köŋıl aitamyn. Qazır qūtqaru operasiiasy jalǧasyp jatyr. Barlyq qajettı qyzmetter jūmys ısteude", – dep tolyqtyrdy Ukraina prezidentı.
Zelenskii AQŞ-ty, Europany jäne özge elderdı būl zymyran şabuylyna qataŋ jauap beruge şaqyrdy.
"Resei däl osyndai terror jasaǧysy keledı jäne būl soǧysty sozyp otyr. Agressorǧa qysym körsetılmei, älemde tynyştyq bolmaidy. Äŋgımeler eşqaşan ballistika men äue bombalaryn toqtatqan emes. Resei terrorist retınde qandai közqarasqa laiyq bolsa, däl sondai közqaras qajet", – dep jazdy ol.
Şabuyl bolǧan jerden tüsırılgen foto men videolarda jerde jatqan adamdardyŋ denelerı, synǧan terezeler, örtenıp jatqan jeŋıl kölıkter, qatty zaqymdanǧan qoǧamdyq kölıkter men jartylai qiraǧan ǧimarattardyŋ qasbetterı körınedı.
