13 sáýir, jeksenbi kúni tańerteń Reseı áskeri Ýkraınadaǵy Sýmy qalasyna ballıstıkalyq zymyrandarmen soqqy jasady, dep habarlaıdy "Adyrna" ulttyq portaly.
Bul týraly jergilikti bılik pen Ýkraına prezıdenti Vladımır Zelenskıı óziniń X áleýmettik jelisindegi paraqshasynda jazdy.
Qala ákimi mindetin atqarýshy Artem Kobzardyń aıtýynsha, shabýyl saldarynan 20 adam qaza tapqan.
Ýkraına ishki ister mınıstri Igor Klımenkonyń málimetinshe, qaza tapqandar sany – 21 adam. Taǵy 83 adam jaraqat aldy, olardyń arasynda jeti bala bar.
Zelenskıı qaza tapqan jáne jaralanǵan beıbit turǵyndar ondaǵan adamǵa jetedi dep málimdedi.
"Sýmy qalasyna ballıstıkalyq zymyranmen jasalǵan sumdyq soqqy. Jaýdyń zymyrandary jaı ǵana qalalyq kóshege, beıbit ómirge soqqy berdi: turǵyn úıler, bilim berý mekemeleri, kólikter... Bul – adamdar shirkeýge baratyn kúni boldy", – dep jazdy ol.
"Mundaı áreketti tek sumyraı ǵana isteı alady. Kádimgi adamdardyń ómirin qıyp jatyr. Qaıtys bolǵandardyń týystary men jaqyndaryna qaıǵyryp kóńil aıtamyn. Qazir qutqarý operaııasy jalǵasyp jatyr. Barlyq qajetti qyzmetter jumys isteýde", – dep tolyqtyrdy Ýkraına prezıdenti.
Zelenskıı AQSh-ty, Eýropany jáne ózge elderdi bul zymyran shabýylyna qatań jaýap berýge shaqyrdy.
"Reseı dál osyndaı terror jasaǵysy keledi jáne bul soǵysty sozyp otyr. Agressorǵa qysym kórsetilmeı, álemde tynyshtyq bolmaıdy. Áńgimeler eshqashan ballıstıka men áýe bombalaryn toqtatqan emes. Reseı terrorıst retinde qandaı kózqarasqa laıyq bolsa, dál sondaı kózqaras qajet", – dep jazdy ol.
Shabýyl bolǵan jerden túsirilgen foto men vıdeolarda jerde jatqan adamdardyń deneleri, synǵan terezeler, órtenip jatqan jeńil kólikter, qatty zaqymdanǵan qoǵamdyq kólikter men jartylaı qıraǵan ǵımarattardyń qasbetteri kórinedi.
