Búgin, kórnekti jazýshy, pýblııst, aýdarmashy, synshy jáne jýrnalıst Ǵabbas Qabyshuly 90 jasqa toldy.
Ol 1935 jyly Shyǵys Qazaqstan oblysy, Ulan aýdany, Uranqaı aýylynda dúnıege kelgen.
Ǵabbas Qabyshuly eńbek jolyn 1955 jyly oblystyq «Altaı bolshevıgi» (qazirgi «Dıdar») gazetinde korrektor, bólim meńgerýshisi, jaýapty hatshy qyzmetterin atqarýdan bastady. 1966 jyly respýblıkalyq «Qazaq ádebıeti» gazetine aýysyp, jaýapty hatshynyń orynbasary, kórkem ádebıet jáne ádebı syn bólimderiniń meńgerýshisi bolyp qyzmet etti.
1974 jyldan KSRO Ádebı qory Qazaq fılıalynyń dırektory, 1983 jyly respýblıkalyq «Ara-Shmel» satıra jýrnalynyń bas redaktory, 1994–1996 jyldary Qazaqstan Jazýshylar odaǵy basqarmasynyń ekinshi hatshysy qyzmetterin atqarǵan.
Ázil-syqaq áńgimeler, novellalar, syn, kórkem ocherk, kósemsóz, túrli taqyrypqa maqala jazǵan jazýshynyń satıralyq kórinisteri «Qymyzhana», «Tamasha» teatrlarynda sahnalanǵan.
Ǵabbas Qabyshulynyń ótkir tili men qoǵamdyq-áleýmettik máselelerge qatysty synshyl kózqarasyn 2011 jyly jazylǵan, prezıdent saılaýyna daıyndyq kezeńin beıneleıtin "Kandıdattyń aty - kandıdat" satıralyq áńgimesinen de ańǵarýǵa bolady.
"Bitpeıtin kezekti merzimderiniń kelesisiniń bitýine áli bir jyly bolsa da, baıaǵydan bergi prezıdentimizdiń qaıda, nege asyqqanyn ııı... kim bilsin, áıteýir, merziminen bir jyl buryn qaıta saılanýy qajettigin etikke qaıyń shege qaqqandaı etip aıtty", – dep, bılik basyndaǵy tulǵalardyń asyǵystyǵy men zańdy óz yńǵaıyna ıkemdeıtin ádetin ájýalaıdy.
Sondaı-aq, jazýshy halyqtyń minez-qulqyn, saılaý proesindegi formalızm men popýlızmdi ashyq synaıdy.
