Ońtústik Koreıada alapat orman órti bolyp, jalyn 17 myń gektar aýmaqty sharpydy. Sońǵy málimetter boıynsha, 26 adam qaza tapty, olardyń arasynda tikushaq ushqyshy da bar, dep habarlaıdy “Adyrna” ulttyq portaly jergilikti BAQ-qa siltep.
Órtpen kúres bes kúnnen beri jalǵasyp jatyr. Kúshti jeldiń áserinen jalyn turǵyn úıler ornalasqan aımaqtarǵa tez tarady. Saldarynan 27 myń adam shuǵyl evakýaııalandy, sondaı-aq bılik júzdegen tutqyndy túrmeden shyǵarýǵa májbúr boldy.
Tótenshe jaǵdaılar mınıstrliginiń málimetinshe, 200-den astam úı órtenip, 1300 jyldan astam tarıhy bar Gýns býdda ǵıbadathanasy joıyldy. Órtti sóndirýge 9 myńnan astam órt sóndirýshi, qutqarýshy jáne áskerıler jumyldyryldy. 500-den astam arnaıy tehnıka men tikushaqtar qoldanylyp jatyr. Alaıda tikushaq apatynan keıin bılik janyp jatqan aýmaqtardyń ústimen ushýǵa tyıym saldy.
Órttiń jyldam taralýyna qurǵaq aýa raıy men qatty jel sebep boldy. Qazirgi tańda úsh óńirde tótenshe jaǵdaı rejımi jarııalandy.
“Elimiz tarıhtaǵy eń alapat órtke tap boldy. Eger jaqyn arada órtti joıa almasaq, úlken máselelerge kezigemiz. Jalyn basqa aýmaqtarǵa jaıylyp ketse, ony sóndirýge resýrstar jetkiliksiz bolýy múmkin”, – dep málimdedi Koreıa Respýblıkasynyń prezıdentiniń mindetin atqarýshy Han Dok Sý.
