Memleket basshysy Qasym-Jomart Toqaev «Expo» kórme ortalyǵyndaǵy etnoaýylda Naýryz merekesin jurtshylyqpen birge qarsy aldy. Bul týraly búgin, 21 naýryzda Aqordanyń baspasóz qyzmeti jazdy, dep habarlaıdy «Adyrna» tilshisi.
Prezıdent merekelik is-sharaǵa jınalǵan kópshilikti Naýryz meıramymen quttyqtap, jyly lebizin jetkizdi.
– Ulystyń uly kúni – ultymyzdyń ulyq meıramy. Bul – bizdiń ata dástúrimiz. Shýaqty kóktem merekesinde búkil dúnıe qaıta jańǵyrady. Kún men tún teńeledi. Qazaq eli áz-Naýryzdy kóne zamannan beri toılap keledi. Naýryz – eń aldymen, ıgilikti isterdiń merekesi. Osy kúnderi ár úıde aq dastarhan jaıylady. El-jurt bir-birimen qaýyshyp, aq tilegin aıtady. Muqtaj jandarǵa qaıyrymdylyq jasap, qamqorlyq kórsetedi. Ulystyń uly kúni bıyl da qasıetti Oraza aıymen tuspa-tus kelip otyr. Elimiz úshin munyń mán-mańyzy zor. Sebebi bizdiń dinimiz ben dástúrimiz – egiz. Qos qazynamyz halqymyzdyń biregeı bolmysyn aıshyqtaı túsedi, – dedi ol.
Qasym-Jomart Kemeluly Naýryz merekesi byltyrdan bastap jańa tujyrymdamaǵa sáıkes on kún boıy atalyp ótetinine nazar aýdaryp, Naýryznamanyń ár kúni taǵylymǵa toly ekenin aıtty
– Naýryz – kóptegen shyǵys halyqtaryna ortaq mereke bolǵanymen, elimizde Ulystyń uly kúnin toılaýdyń erekshe dástúri bar. Bul meıramnyń tól mádenıetimizdegi orny aıryqsha. Sheteldik meımandar da mereke qarsańynda Qazaqstanǵa arnaıy kelip, bizdiń salt-dástúrimizben tanysady, ádet-ǵurpymyzdy tanyp-biledi. Biz osy rýhanı qazynamyzdy jan-jaqty dáripteýimiz kerek. Naýryznama boıynsha búgin – Yntymaq kúni. Elimiz úshin aýyzbirshilik pen tatýlyqtyń orny qashanda erekshe. Búkil halqymyz ultyna, dinine qaramastan bir el bolyp, Naýryzdy birge atap ótedi. Biz osyndaı bereke-birligimizdiń arqasynda bolashaqqa zor senimmen qarap, tek alǵa qaraı qadam basyp kelemiz. Jan-jaqty reforma jasap, memlekettiń saıası júıesin jańǵyrtyp jatyrmyz. Aýqymdy ekonomıkalyq jobalardy qolǵa aldyq. Baısaldy syrtqy saıasatymyzdyń arqasynda Qazaqstan búkil álemge bedeldi memleket retinde tanymal boldy, – dedi prezıdent.
