Grýzııa soty memleket qarjysyn jymqyrdy dep aıyptalǵan eks-prezıdent Mıhaıl Saakashvılıdiń túrme merzimin toǵyz jylǵa uzartty, dep habarlaıdy "Adyrna" ulttyq portaly.
Onyń advokaty Dıto Sadzaglıshvılı Tbılısı qalalyq soty bastapqy alty jyldyq jazaǵa qosymsha úsh jyl qosqanyn málimdedi.
Grýzııa soty Saakashvılıdi 2004-2013 jyldar aralyǵynda memleket bıýdjetinen toǵyz mıllıon ları (shamamen 3,2 mıllıon dollar) jymqyrdy dep tanydy. Advokat bul aıyptaýlardy «oıdan qurastyrylǵan» dep atady.
2018 jyly 57 jastaǵy Saakashvılı bılikti asyra paıdalandy degen aıyppen syrttaı alty jylǵa sottalǵan. Quqyq qorǵaý uıymdary bul úkimniń saıası astary bar dep sanaıdy. 2021 jyly ol Ýkraınadan Grýzııaǵa oralǵannan keıin qamaýǵa alyndy.
2022 jyldan beri eks-prezıdent Tbılısıdegi Vivamed aýrýhanasynda em qabyldap keledi. «Ol birneshe sozylmaly aýrýmen aýyrady, jaǵdaıy keıde nasharlap ketedi», – dedi klınıka dırektory Zýrab Chkaıdze.
Buǵan deıin Eýroparlament Saakashvılıdi dereý bosatýǵa shaqyrsa, Ýkraına prezıdenti Vladımır Zelenskıı ony Kıevke ekstradıııalaýdy talap etken. Aıta keteıik, Saakashvılı 2019 jyldan bastap Ýkraına azamaty.
Jańa sot úkimine sáıkes, onyń jazasy 2021 jyldyń 1 qazanynan bastap esepteledi, ıaǵnı ol 2030 jyldyń 1 qazanynda ǵana bostandyqqa shyǵa alady. Sonymen qatar, oǵan 2007 jyldyń 7 qarashasyndaǵy oqıǵalar men shekarany zańsyz kesip ótýge baılanysty taǵy birneshe qylmystyq is qozǵalǵan.
