AQSh prezıdenti Donald Tramp Kongress aldynda sóılegen sózinde Ýkraına prezıdenti Vladımır Zelenskııden hat alǵanyn jáne onyń kelissózderge múmkindiginshe tez otyrýǵa daıyn ekenin málimdedi, dep habarlaıdy "Adyrna" ulttyq portaly.
"Búgin men Zelenskııden mańyzdy hat aldym.Ýkraına uzaq merzimdi beıbitshilikke qol jetkizý úshin múmkindiginshe tez kelissózder ústeline otyrýǵa daıyn", – dedi AQSh prezıdenti Kapıtolııde sóılegen sózinde.
Ýkraınadaǵy qaqtyǵys týraly aıta kele, Tramp "bul aqylsyzdyqty toqtatatyn ýaqyt keldi, eki tarappen de dıalog júrgizý kerek" dep atap ótti.
Ol ýkraın qaqtyǵysyn aıaqtaý úshin tabandy túrde jumys istep jatqanyn aıtty.
Sonymen qatar, Tramp Reseı tarapynan da Ýkraına boıynsha beıbit kelissózderge daıyn ekeni týraly "kúshti sıgnaldar" alǵanyn jetkizdi.
