2 naýryzda AQSh-tyń Firefly Aerospace kompanııasynyń Blue Ghost ushqyshsyz ǵarysh kemesi Aıǵa sátti qondy, dep habarlaıdy “Adyrna” ulttyq portaly Reuters agenttigine silteme jasap.
Bul oqıǵa jeke kompanııalardyń Aıǵa qoný jarysyndaǵy mańyzdy kezeńderdiń biri.
Blue Ghost ǵarysh kemesi Astana ýaqytymen 13:35-te Aıdyń soltústik-shyǵys bóligindegi Morıa Krızısov aımaǵyna sátti qondy.
Kólemi shaǵyn kólikke uqsas tórt dóńgelekti apparat Aıǵa 10 ǵylymı aspapty jetkizdi. Ol eki apta boıy ǵylymı zertteýler júrgizedi.
Firefly Aerospace – Aıǵa sátti qonǵan tarıhtaǵy ekinshi jeke kompanııa.
Buǵan deıin Intuitive Machines kompanııasynyń Odısseı qondyrǵyshy Aıǵa jetkenimen, kemeniń qoný buryshy durys bolmaýynan kóptegen borttyq quraldar isten shyqqan edi. Osylaısha, Firefly Aıǵa tolyqtaı sátti qonǵan alǵashqy jeke kompanııa atandy.
Aıǵa qoný tarıhynda AQSh, KSRO, Qytaı, Úndistan jáne Japonııa sııaqty bes memleket ǵana jetistikke jetken. AQSh pen Qytaı qazirgi ýaqytta Aıǵa adam jiberý baǵdarlamalaryn damytyp, jeke kompanııalarmen seriktestik ornatýda.
Blue Ghost Florıdadaǵy Kennedı ǵarysh ortalyǵynan ushyrylǵannan keıin, 4,5 mıllıon shaqyrymdyq sapardy eńserip, Jerden 383 myń shaqyrym qashyqtyqta ornalasqan Aıǵa jetti.
Bul mıssııa jeke kompanııalardyń ǵaryshty ıgerýdegi jańa dáýirin kórsetip, bolashaqtaǵy ǵaryshtyq zertteýler men Aıdy ıgerý baǵdarlamalaryna serpin bermek.
