Shyǵys Qazaqstan oblysynda devıantty minez-qulqy bar balalarǵa arnalǵan arnaıy mektep-ınternattan tórt jasóspirim qashyp ketken. Olar qatty aıazda syrt kıimsiz qoǵamdyq dárethanada jasyrynǵan, dep habarlaıdy "Adyrna" ulttyq portaly.
Jasóspirimderdiń aıtýynsha, mundaı qadamǵa barýǵa mekemedegi álimjettik pen zorlyq-zombylyq sebep bolǵan.
Jelidegi aqparatqa sáıkes, balalar ózderine kórsetilgen qatygezdikke tóze almaı, ınternattan ketýge májbúr bolǵan. Olardyń dalada tońyp qalǵanyn rastaıtyn vıdeo áleýmettik jelilerde tarady. Kadrlarda tórt jasóspirimniń sýyqtan dirildep, jeıdemen otyrǵany kórinedi.
"Mine, qoldary qatyp qalǵan. Ótinemin, kómektesińizder!" – deıdi vıdeodaǵy daýys.
Atalmysh oqıǵa ShQO Altaı aýdanyna qarasty Serebrıansk qalasynda bolǵan. Sol túni aımaqta aýa temperatýrasy -35 gradýsqa deıin tómendegen.
Arnaıy mektep-ınternat dırektorynyń mindetin atqarýshy Sarqyt Dáýletova oqýshylardyń qashý deregin rastady.
"Balalar túnde tabyldy. Barlyǵyn birden aýrýhanaǵa jiberdik. Ekeýi emdelip shyqty. Qazirgi ýaqytta balalardan jaýap alynyp jatyr," – dedi ol.
Alaıda ol mekemedegi álimjettik faktileri týraly pikir bildirýden bas tartty.
Qazirgi tańda prokýrorlar men polıııa bul iske qatysty tekserý júrgizýde. Resmı aqparatqa súıensek, balalarǵa zorlyq-zombylyq kórsetildi degen málimet áli rastalǵan joq. Degenmen, olar "únemi qashatyn balalar" sanatynda bolǵan.
ShQO bilim basqarmasy oqıǵaǵa qatysty ázirge naqty túsinikteme bermedi. Aıta keteıik, atalǵan mektep-ınternatta 50-ge jýyq bala tárbıelenedi.
