Qaraǵandy oblysynda 12 jastaǵy Damır Býlýmbaevtyń anasy tórt ret jedel járdem shaqyrýǵa májbúr bolǵan. Alǵashqy úsh ret medıınalyq qyzmetkerler balany aýrýhanaǵa jatqyzýdan bas tartyp, onyń aýyrsynýyn psıhosomatıka dep baǵalaǵan, dep habarlaıdy "Adyrna" ulttyq portaly Orda.kz-ke siltep.
Tek tórtinshi ret shaqyrǵannan keıin ǵana bala aýrýhanaǵa jetkizilgenimen, tym kesh bolǵan.
Ekaraganda.kz málimetinshe, Damır jýyrda ǵana tumaýdan emdelip shyqqan. 26 qańtar kúni keshke ol aıaq bulshyqetterinde qatty aýyrsyný sezingenin aıtyp, anasy jedel járdem shaqyrǵan. Biraq kelgen feldsher tek syrttaı qarap, balanyń jaǵdaıyn aýyr dep eseptemegen. Kelesi shaqyrtýlarǵa da feldsher jaýap bermeı, tek tórtinshi márte kelgennen keıin ǵana bala aýrýhanaǵa jetkizilgen.
Damırdiń týystarynyń aıtýynsha, jedel járdem feldsheri aýrýdy elemeı, balany psıhıatrııalyq aýrýhanaǵa jiberemin dep qorqytqan. Bala qaıtys bolar aldynda anasynan kómek surap, "mama, men ólgim kelmeıdi" dep aıtqan.
Aýrýhanaǵa jetken kezde reanımatolog dárigerlerdiń balany qutqarýǵa tyrysqanyna qaramastan, onyń ómirin saqtap qalý múmkin bolmady.
Qaraǵandy oblysynyń densaýlyq saqtaý basqarmasy oqıǵaǵa qatysty tergeý bastalǵanyn habarlady. "Medıınalyq qyzmetkerler tarapynan buzýshylyqtar anyqtaldy. Kináliler jaýapqa tartylady", – delingen basqarmanyń resmı málimdemesinde.
Balanyń týystary ony aman alyp qalýǵa bolar edi dep qaıǵyrýda.