Qazaqstanda 2025 jyldyń 1 aqpanynan bastap elektr energııasynyń baǵasy kóterilýi múmkin, dep habarlaıdy “Adyrna” ulttyq portaly.
Energetıka mınıstrligi elektr energııasynyń shekti tarıfterin bekitý týraly buıryq jobasyn ázirledi. Bul qujatqa sáıkes, 36 energııa óndirýshi uıym óz shyǵyndarynyń ósýine baılanysty tarıfterdi túzetýge ótinim bergen. Sonymen qatar, úsh jańa kompanııa energııa óndirýshi uıymdar tizimine kirý úshin tarıfterdi belgileý usynysyn bildirgen.
Aldyn ala esepteýler boıynsha, elektr energııasynyń quny kVt/saǵatyna shamamen 2 teńgege ósýi múmkin. Bul ózgeris biryńǵaı satyp alýshy úshin eseptelgen. Qazirgi ýaqytta energııa óndirýshi uıymdardyń ótinimderi qaralý satysynda tur. Barlyq usynystar tutynýshylardyń múddeleri men salanyń turaqty damý qajettiligi arasyndaǵy tepe-teńdikti qamtamasyz etý úshin muqııat taldanady.
Mınıstrliktiń sózinshe, tarıfterdiń kóterilýine birneshe faktor áser etýde. 2024 jyly ortasha jalaqy 18%-ǵa ósip, 425 myń teńgege jetti. 2025 jyly bul kórsetkishtiń 15-20%-ǵa artyp, 490 myń teńgege deıin jetýi múmkin. Jalaqyny kóterý bilikti kadrlardy tartýǵa jáne saqtaýǵa baǵyttalǵan.
2024 jyldyń qańtar aıyndaǵy málimet boıynsha, energetıka salasynda 52,5 myń qyzmetker jumys istese, shtattyq deńgeıi 57 myńdy quraıdy, demek 4,5 myń mamannyń jetispeýshiligi bar. Kómirdiń, gazdyń jáne olardy tasymaldaýdyń, metall jáne jóndeý jabdyqtarynyń qymbattaýy shyǵyndardyń negizgi faktorlarynyń biri bolyp otyr.
Energetıka mınıstriniń buıryq jobasy 22 qańtarǵa deıin talqylaý úshin “Ashyq normatıvtik-quqyqtyq aktiler portalyna” jarııalandy. Qujatta energııa óndirýshi uıymdardyń kópshilik toptary úshin shekti tarıfterdi kóterý kózdelgen. Bul ózgerister tutynýshylardyń múddeleri men energetıka salasynyń turaqty damýyn qamtamasyz etý maqsatynda qarastyrylýda.
Eger usynylǵan ózgerister maquldansa, 2025 jyldyń 1 aqpanynan bastap Qazaqstanda elektr energııasynyń tarıfteri kóterilýi múmkin.
