Ázerbaıjan Prezıdenti Ilham Álıev Aqtaý mańynda apatqa ushyraǵan ushaqtyń jerden atqylanǵanyn málimdep, Reseıge qoıǵan sharttarynyń oryndalýyn talap etti, dep habarlaıdy "Adyrna" ulttyq portaly AzTV telearnasyna siltep.
«Alǵashqy nusqalar boıynsha jumys júrgizilip jatyr. Biraq naqty qorytyndylardy «qara jáshikterdi» taldaýdan keıin ǵana jasaýǵa bolady. Degenmen qazirdiń ózinde ushaqtyń Groznyı mańyndaǵy Reseı áýe keńistiginde syrtqy zaqym alǵany anyq kórinip tur. Bizdiń ushaqqa radıoelektrondyq áser jasalǵany týraly dálelder bar. Sondaı-aq jerden atqylaý saldarynan ushaqtyń artqy bóligi men fıýzelıajy qatty zaqymdanǵany belgili», – dedi Álıev.
Prezıdent Reseı resmı túrde keshirim surap, óz kinásin moıyndaýy, kinálilerdi jaýapqa tartýy jáne Ázerbaıjanǵa, sondaı-aq zardap shekken jolaýshylar men ekıpaj múshelerine ótemaqy tóleýi tıis ekenin atap ótti.
«Bir talap oryndaldy – Reseı keshirim surady. Qalǵan sharttardyń oryndalýyn kútemiz», – dedi Álıev telearnaǵa bergen suhbatynda.
Álıev áńgimeniń basyna oralyp, Reseıdiń bolǵan jaǵdaıdy jasyrýǵa tyrysqanyna tańdanysyn bildirdi.
«Bizdi resmı qurylymdardyń gaz ballonynyń jarylýy týraly boljamdar usynýy qynjyltty jáne tańǵaldyrdy. Bul Reseı tarapynan máseleni jabýǵa tyrysqanyn anyq kórsetedi. Bul árıne, eshkimge abyroı ápermeıdi. Ókinishke qaraı, alǵashqy úsh kúnde Reseı tarapynan tek orynsyz nusqalardy estidik», – dep bólisti Álıev.
Ázerbaıjan tergeýdi Memleketaralyq avıaııalyq komıtetke berýden bas tartty. Óıtkeni onyń jumysynyń obektıvtiligine kúmán keltirdi.
Prezıdenttiń tapsyrmasymen Reseıdiń jeti qalasyna áýe reısteri belgisiz merzimge toqtatyldy. Sondaı-aq reseılik áýe kompanııalardyń Ázerbaıjannyń úsh qalasyna reısteri shekteldi. Bul sheshim jolaýshylar qaýipsizdigi úshin qabyldandy.
