11 jylǧa sottalǧan Arystanbek Mūhamediūly Toqaevqa hat jazdy

11 jylǧa sottalǧan Arystanbek Mūhamediūly prezident Qasym-Jomart Toqaevqa hat joldap, jemqorlyq pen zaŋ būzuşylyqtardy toqtatudy sūrady, dep habarlaidy «Adyrna» tılşısı orda.kz-ke sılteme jasap. Ol memleket basşysynyŋ «Ädılettı Qazaqstan: zaŋ men tärtıp, ekonomikalyq ösım, qoǧamdyq optimizm» atty joldauy milliondaǧan qazaqstandy şabyttandyrǧanyn mälımdedı. «Ädılettı Qazaqstan qūruǧa, barşaǧa teŋ mümkındıkter beretın memleket qalyptastyruǧa degen senım ūialatty. Joldauyŋyz ülken rezonans tudyryp, sonyŋ ışınde būl hattyŋ avtory da onyŋ äserın sezındı»,—dedı Arystanbek Mūhamediūly. Aituynşa, jemqorlyq «Ädılettı Qazaqstandy» qūruǧa kedergı keltıredı. Ol bırneşe mysal keltırıp, sottardyŋ alaiaqtardy qoldap, qūqyqtyq tärtıptı nyǧaituǧa baǧyttalǧan reformalarǧa kedergı jasaǧanyn jetkızdı. «2022 jyldyŋ nauryz aiyna deiın«İnformatizasiia turaly» Zaŋnyŋ 33-1 babynda sifrlyq aktivterdıŋ, bitkoinnıŋ ainalymy tyiym salynǧan dep naqty belgılengen. Bıraq Almaty qalasy Alatau audandyq sotynyŋ sudiasy D. S. Aiqūlov 2024 jylǧy qaraşada Arman Baqadamnyŋ paidasyna şeşım şyǧardy, ol sotta 2022 jyly bitkoin (qamtamasyz etılmegen sandyq aktiv) arqyly jyljymaityn mülık üşın tölem jasaǧanyn mälımdedı»,—dep jazdy hatta. Sonymen qatar ol Astana qalasynyŋ sudiasy A.Kärımovaǧa syn aitty. Mūhamediūlynyŋ pıkırınşe, ol belgılı bır tūlǧalardyŋ müddelerın qoldaǧan. Sondai-aq, būl  jemqor toptardyŋ qorqytu äreketterın körsetedı. «Sudia A.Kärımova S. Qarymsaqovtyŋ müddelerın aşyq türde qoldai otyryp, A. Nūrlanovtyŋ S. Qarymsaqovtan memlekettık bajdy öndırıp alu turaly şeşımın joidy»,— dep jazdy ol. Ol Almaty qalasynyŋ soty jaily da aitty. «Sızdıŋ tapsyrmaŋyz boiynşa «Nomad Land’s» JŞS iesı A.Ahmetov memlekettık menşıktı qaitaru üşın sotqa ötınış bergende, Almaty qalasynyŋ soty kerısınşe şeşım qabyldady, memlekettık mülıktı jekemenşıkke beru üşın şeşım şyǧardy. Astana qalasy arasyndaǧy qylmystyq ıster boiynşa sot sudiasy Q.İmaşev Qazaqstan Respublikasy zaŋdaryn jäne sızdıŋ tapsyrmalaryŋyzdy elemei, Qazaqstan Respublikasynyŋ Esep komitetınıŋ 2019 jylǧy jeltoqsan aiyndaǧy Memlekettık audit turaly qorytyndylaryna jäne Qazaqstan Respublikasynyŋ Qarjy ministrlıgınıŋ Astana qalasy boiynşa Işkı memlekettık audit departamentınıŋ 2022 jylǧy 24 aqpandaǧy qorytyndylaryna qaişy kelıp, «Altyn adam» baǧdarlamasy men basqa baǧdarlamalar boiynşa būzuşylyqtar anyqtalǧan joq degen şeşımge qaramastan, 2024 jylǧy 29 aqpandaǧy sot ükımın jeke käsıpker «Tūrsynbek» kompaniiasynyŋ qorytyndylary boiynşa şyǧardy, būl kompaniiada tek bır adam jūmys ısteidı jäne ol üş kün ışınde qorytyndy jasaǧan. «Tūrsynbek» jeke käsıpkerlıgınıŋ basşysy sotta öz qorytyndylaryn jasau üşın basqa JŞS jäne JK-nıŋ derekterın paidalanǧanyn mälımdedı, alaida osy ūiymdardyŋ qūjattary sot ısınde joq. Būl ūiymdardan sūrau salǧanda, olar «Tūrsynbek» JK-nıŋ qorytyndylaryna qatysudy joqqa şyǧardy», — dedı Arystanbek Mūhamediūly. Ol prezidentten «zaŋsyzdyqtardy» toqtatudy sūrap, Qazaqstannyŋ qūqyqtyq jüiesıne degen halyqtyŋ senımın saqtau qajettıgın atap ötedı. «Sızden zaŋsyzdyqty toqtatyp, saiasatyŋyzǧa qarsy äreketterge tosqauyl qoiudy sūraimyn», — dep sözın aiaqtady Mūhamediūly. Eske sala ketsek, būǧan deiın Arystanbek Mūhamediūlynyŋ appeliasiialyq şaǧymyn sot maqūldamaǧan bolatyn. Oǧan asa ırı mölşerde para beruge oqtaldy degen aiyp taǧylyp, sot jaza merzımın 11 jylǧa ūzartty.