Memlekettik keńesshi Erlan Qarınniń tóraǵalyǵymen Memlekettik rámizder men vedomstvolyq jáne olarǵa teńestirilgen ózge de nagradalar geraldıkasy máseleleri jónindegi respýblıkalyq komıssııanyń otyrysy ótti, dep habarlaıdy “Adyrna” ulttyq portaly.
Komıssııa otyrysynda Mádenıet jáne aqparat mınıstriniń, sondaı-aq Shymkent qalasy ákiminiń esebi tyńdaldy.
Qatysýshylar vedomstvolyq marapattar júıesin, memlekettik rámizderdi qoldaný jáne paıdalaný tártibin retteıtin zańnamalyq jáne normatıvtik-quqyqtyq aktilerdi jetildirý máselelerin qarastyrdy.
Jıyn barysynda respýblıkalyq komıssııa birqatar memlekettik organnyń jańadan úsh vedomstvolyq nagrada engizý jónindegi usynysyn qoldamady.
«Vedomstvolyq nagradalar salasyn retke keltirý kerek. Birinshiden, vedomstvolyq nagrada túrlerin kóbeıtýdiń qajettiligi joq. Qaıta ony tereń zerdelep, marapattardy ońtaılandyrý kerek. Ekinshiden, árbir memlekettik organ úshin vedomstvolyq nagradalardyń kvotasyn belgileý qajet. Úshinshiden, ortalyq memlekettik organdar basshylarynyń vedomstvolyq nagradalar salasyna qatysty jeke jaýapkershiligin arttyrǵan jón», – dep atap ótti Memlekettik keńesshi.
Erlan Qarın memlekettik, vedomstvolyq jáne qoǵamdyq marapattar salasynda memlekettik baqylaýdy qamtamasyz etý jumystary júrgizilip jatqanyna nazar aýdardy. Tıisti zańdarǵa túzetý engizý týraly usynystar qazirgi ýaqytta Parlamenttiń qaraýyna joldanǵan.
Jıyndy qorytyndylaı kele, Memlekettik keńesshi memlekettik rámizder, marapattar jáne geraldıka salasyndaǵy jumystardyń tıimdiligin arttyrýǵa qatysty naqty tapsyrmalar berdi.
