Ózbekstan shetelde turatyn otandastaryn qoldaý úshin arnaıy Vatandosh (Otandas) kartasyn engizdi. Bul bastama prezıdent Shavkat Mırzıeevtiń 2023 jyldyń 20 qarashasyndaǵy qaýlysy negizinde qabyldanǵan, dep habarlaıdy "Adyrna" ulttyq portaly fergana.agency-ǵa silteme jasap.
Ózbekstannan shyqqan, biraq shetelde turatyn azamattar Vatandosh kartasyn ala alady. Ol vızasyz Ózbekstanǵa kirý sııaqty birqatar jeńildikter beredi.
Bul karta shetelde turatyn, biraq Ózbekstannyń áleýmettik jáne ekonomıkalyq ómirine belsendi qatysyp júrgen otandastardy yntalandyrýdyń bir túri. Ol eldiń basqa memlekettermen dostyq qarym-qatynastaryn nyǵaıtýǵa aıtarlyqtaı úles qosqan jáne qaıyrymdylyqpen aınalysatyn tulǵalarǵa beriledi.
Karta bes jylǵa jaramdy, biraq onyń jaramdylyq merzimi ulttyq tólqujattyń merziminen aspaıdy. Kartany berý týraly sheshimdi arnaıy komıssııa qabyldaıdy. Úmitkerler Ózbekstan mınıstrlikteri men vedomstvolarynyń usynymdary negizinde qaralady.
Kartany paıdalanýshylar vızasyz Ózbekstanǵa kirýge, turýǵa ruqsatsyz jyljymaıtyn múlik satyp alýǵa, qosymsha ruqsattarsyz jumysqa ornalasýǵa, Ózbekstan azamattaryna arnalǵan medıınalyq, bilim berý jáne basqa memlekettik qyzmetterdi paıdalanýǵa múmkindik alady.
Bul artyqshylyqtar otandastarǵa arnalǵan jeńildetilgen karta ıeleriniń otbasy múshelerine de qatysty. Olardyń ata-analary, jubaıy jáne balalary elden shyqpaı-aq vızany birneshe ret uzartý múmkindigine ıe bolady. Sonymen qatar, ishki ister organdary olar úshin respýblıka aýmaǵynda ýaqytsha tirkeýdi jáne onyń merzimin uzartýdy tegin rásimdeıdi.
Prezıdent jarlyǵynda atap ótilgendeı, Vatandosh kartasyn engizý bastamasy shetelde turatyn otandastardy qoldaýǵa jáne yntalandyrýǵa, olardy tarıhı otanymen biriktirýge, elge degen maqtanysh sezimin nyǵaıtýǵa, ulttyq sana-sezimdi saqtaýǵa jáne olarmen turaqty dıalogty keńeıtýge baǵyttalǵan.
