Aýyldaǵy aǵaıynnyń ál-aýqatyn jaqsartý maqsatynda qolǵa alynǵan memlekettik baǵdarlamanyń ıgiligin kórgender sany shash etekten. Sonyń biri- Nurlybek Stanbekov.
«Aýyl Amanaty» baǵdarlamasy boıynsha 2,5% mólsherlememen 6 000 000 teńge kóleminde nesıe aldy. Bul qarjy sút baǵytyndaǵy sharýashylyqty damytýǵa baǵyttaldy.
Nurlanbek aýyldy jerlerden satyp alynǵan sıyrlardy asyldandyrýmen aınalysady. Qazir fermada 12 bas sıyr bar, onyń ishinde bir Alataý jáne bir Shveı tuqymdy sıyrlar saýynda tur. Qalǵan sıyrlar kelesi buzaýlaý kezeńin kútýde.
Qazirgi ýaqytta Nurlanbek sút ónimderin óndirý jáne satý boıynsha belsendi jumys júrgizip jatyr. Sút satylyp, aıran, qurt jáne maı óndirilip, tólder ósirilýde.
Kásip ıesi, sharýashylyǵyn keńeıtý josparlap otyr, kredıtti tolyq ótegennen keıin sút baǵytyndaǵy jumys kólemin ulǵaıtý kózdelýde.
Bul bastama aýyl sharýashylyǵynyń damýyna jáne jergilikti ónimderdiń sapasyn arttyrýǵa úlken úles qosyp otyr. Nurlanbek Stanbekovtyń sút sharýashylyǵyn damytýdaǵy tájirıbesi men jetistikteri aýyldyq aımaqtardaǵy kásipkerlerge úlgi bolýda.
Aıta keteıik, 2023 jyly astaý alǵan jobaǵa respýblıkalyq bıýdjetten Almaty oblysyna 8 mlrd. 267,6 mln. teńge qarajat bólindi.
Aýylsharýashylyǵyn kásiptiń kózi retinde ıgergen azamattar atalmysh baǵdarlamanyń sharapatyn kórdi. Almaty oblysynda malbasyn kóbeıtýge, ósimdik sharýashylyǵyn damytýǵa jáne birneshe sharýashylyqtyń basy bir arnaǵa toǵysqan kooperatıvter men ózgede bıznes túrlerine jalpy 1 090 nesıe berildi.
Baǵdarlama oblystaǵy barlyq 133 aýyldyq okrýgti qamtıdy. Aýyl turǵyndarynyń tabysyn arttyrý jobasy aıasynda beriletin shaǵyn nesıeler - «Qonaev ÁKK» AQ arqyly júzege asady.
Almaty oblysynyń aýylsharýashylyǵy basqarmasynyń deregine sáıkes, mal sharýashylyǵy salasyna 894 shaǵyn nesıe, onyń ishinde 36 kooperatıv qarjylandyrýǵa ıe boldy. Al, ósimdik sharýashylyǵyna 40 shaǵyn nesıe, onyń úsheýi kooperatıvke tıesili. Aýyl sharýashylyǵyna jatpaıtyn kásipkerlik sýbektilerine 149 shaǵyn nesıe bólinse, aýyl sharýashylyǵy tehnıkasyn satyp alýǵa 7 nesıe berildi.
