Memleket basshysy Qasym-Jomart Toqaev «QazaqGaz» UK AQ basqarma tóraǵasy Sanjar Jarkeshovti qabyldady. Bul týraly búgin, 14 qazanda Aqordanyń baspasóz qyzmeti jazdy, dep habarlaıdy «Adyrna» tilshisi.
Qasym-Jomart Toqaevqa ulttyq kompanııanyń bıylǵy 9 aıda atqarǵan jumysynyń qorytyndysy týraly esep berildi. Prezıdentke iri ınvestıııalyq jobalardy júzege asyrý jáne tranzıttik áleýetti damytý boıynsha buǵan deıin berilgen tapsyrmalarynyń oryndalý barysy baıandaldy.
Sanjar Jarkeshov «Almaty – Baıserke – Talǵar» gaz qubyrynyń ekinshi jelisin salý, sondaı-aq Almatydaǵy ekinshi jáne úshinshi jylý elektr ortalyqtarynyń gazǵa arnalǵan ınfraqurylymyn jasaqtaý jumystary aıaqtalǵanyn aıtty. Budan bólek, «Taldyqorǵan – Úsharal» magıstraldi gaz qubyry salyna bastady. Ózbekstanǵa gaz tasymaldaý kólemin ulǵaıtý úshin «Orta Azııa – Ortalyq» júıesin jańǵyrtý boıynsha daıyndyq jumystary júrip jatyr.
Memleket basshysyna resýrstyq bazany keńeıtý sharalary jóninde málimet berildi. «QazaqGaz» UK» AQ basqarma tóraǵasy el ekonomıkasyndaǵy taýarly gazdy tutyný kóleminiń eselep artýyn eskere otyryp, atalǵan salanyń geologııalyq barlaý jobalaryn júzege asyrýǵa shetelden ınvestıııa tartylǵanyn aıtty. Chevron kompanııasymen Aqtóbe oblysynda geologııalyq barlaý jumystaryn júrgizý týraly kelisimge qol qoıylǵan. Joba tolyǵymen ınvestordyń óz qarjysy esebinen júrgiziledi.
Sonymen qatar Qasym-Jomart Toqaevqa Energetıka, Ulttyq ekonomıka mınıstrlikterimen birlese júrgizilip jatqan bastamalar týraly baıandaldy. Bul sharalar Memleket basshysy Joldaýynda aıtqan gaz salasynyń ınvestıııalyq tartymdylyǵyn arttyrýǵa, kógildir otynnyń laıyqty tarıfi men kóterme baǵasyn belgileýge qatysty tapsyrmalaryn oryndaý maqsatynda qabyldanyp jatyr.
Kezdesý sońynda Prezıdent jylytý maýsymynda halyqty jáne ekonomıkany gazben turaqty qamtamasyz etý, salany reformalaýdy jalǵastyrý, gaz tasymaldaý júıesiniń qýattylyǵyn arttyrý boıynsha birqatar tapsyrma berdi.
