Qaraǧandy oblysynyŋ Qarqaraly audany jäne Pavlodar oblysynyŋ Baianauyl tabiǧi parkındegı dala örtı 45 myŋ gektar jerge tarap ülgergen. Būl turaly bügın Tötenşe jaǧdailar ministrlıgı aitty, dep habarlaidy «Adyrna» tılşısı.
«Qaraǧandy jäne Pavlodar oblystarynyŋ şekara aumaǧyndaǧy örttıŋ jalpy audany 45 myŋ ga qūrady. Būl rette Pavlodar oblysyndaǧy dala örtı aldyn ala 10 myŋ ga alqapta oqşaulanǧanyn eske salamyz»,—dep jazdy TJM baspasöz qyzmetı.
Vise-ministr Erlan Nūrpeiısov Qaraǧandy oblysyna baryp, jaǧdaidy baqylauǧa aldy.
Aita keteiık, örttı söndıruge Qaraǧandy oblysy TJD jäne jergılıktı atqaruşy organdarynyŋ küşterı men qūraldarynan 386 adam, 64 bırlık tehnika, TJM men Qorǧanys ministrlıgınıŋ äue kemelerı jūmyldyryluda. Äue kemelerı ört oşaqtaryna barlyǧy 30 ret 50-den astam tonna kölemınde su töktı.
Būǧan deiın Qaraǧandy oblysyndaǧy dala örtın söndıru kezınde TJD qyzmetkerı Hali Hairattyŋ qaza tapqanyn jazǧan edık.
