Ortalyq referendým komıssııasy Qazaqstanda atom elektr stanııasyn salýǵa arnalǵan referendýmnyń aldyn ala qorytyndysyn jarııalady. Halyqtyń 71,12%-y AES qurylysyn qoldady. Exit poll nátıjeleri de osy kórsetkishterge jaqyn boldy.
Májilis Spıkeri, «AMANAT» partııasynyń Tóraǵasy Erlan Qoshanov bul referendým Qazaqstannyń saıası mádenıetiniń jańa deńgeıge kóterilgenin aıǵaqtaıtynyn aıtty.
«Jańa saıası jaǵdaıda Táýelsizdigimizdiń 33 jyldyq tarıhyndaǵy úsh referendýmnyń ekeýi Memleket basshysy Qasym-Jomart Toqaevtyń bastamasymen ótti. Sóz joq, jańa saıası mádenıet dál osylaı qalyptasady. Ár azamat qoǵam úshin mańyzdy máselelerdi sheshý isine tikeleı aralasyp, el taǵdyryna óziniń qatysty ekenin sezinedi. Bul – demokratııanyń is júzindegi kórinisi», - dedi ol.
Sondaı-aq Májilis Tóraǵasy búginde depýtattardyń óńirlerdi jıi aralap, halyqpen tikeleı baılanys ornatyp júrgenin atap ótti. Onyń sózinshe, atalǵan jumystardyń nátıjesinde qoǵamdyq sana ózgerip, jańa saıası mádenıettiń qalyptasyp jatqany baıqalady. Turǵyndar kez kelgen másele boıynsha óz pikirlerin ashyq aıtyp, ony barlyq deńgeıde batyl qorǵaýda. Bul – Memleket basshysy Qasym-Jomart Toqaevtyń Ádiletti Qazaqstandy qurýǵa baǵyttalǵan saıası reformalar baǵytynyń mańyzdy nátıjesi.
«Referendýmnyń qorytyndysy qoǵamdaǵy jalpy kóńil-kúıdiń shynaıy beınesin kórsetedi. Halyqtyq shtab barlyq óńirlerde myńdaǵan kezdesý ótkizip, qazaqstandyqtar AES salýdyń el bolashaǵy úshin asa mańyzdy ekenin túsinip otyrǵanyn kórsetti. Kásipkerler, sharýalar, kenshiler, jumysshylar, jastar, muǵalimder, dárigerler jáne kóptegen basqa toptar damyǵan ekonomıkasy bar elde ómir súrýge múddeli ekenin bildirdi. Olardyń barlyǵy bul maqsatqa jetýdiń kilti energetıkalyq táýelsizdik ekenin jáne AES qurylysy qajettigin tolyq túsinedi», - dedi Erlan Qoshanov.
Beıbit atom – senimdi, qaýipsiz, ekologııalyq taza energııa kózi. Bul sheshim Qazaqstannyń ǵylym, tehnıka, óndiris jáne aýyl sharýashylyǵy sııaqty salalarynda damýdyń jańa kezeńine ótýine múmkindik beredi. Halyq óziniń tańdaýyn jasap, el bolashaǵyna úles qosty.
Sonymen qatar «AMANAT» partııasynyń Tóraǵasy AES salýdy qoldaý jónindegi Halyqtyq shtabtyń barlyq múshelerine – saıası partııalardyń, qoǵamdyq birlestikterdiń, kásipodaqtar men qaýymdastyqtardyń ókilderine ıgi iske at salysqandary úshin alǵysyn bildirdi.
