Ustazdar kúni qarsańynda «Oral qalasynyń Qurmetti pedagogi» tósbelgisin ıelengen Dinmuhamed Qonaev atyndaǵy №44 mektep-gımnazııasy tarıh pániniń muǵalimi, pedagogıka ǵylymdarynyń magıstri, pedagog-sheber Jeńis Hamzın 27 jyldan beri ustazdyq etip keledi.
Jeńis Kákibaıuly Syrym aýdany Alǵabas aýylyn týmasy. Syrym aýdany Jympıty orta mektebin 1991 jyly bitirip, 1993 jyly Oral qalasyndaǵy A.S.Pýshkın atyndaǵy pedagogıkalyq ınstıtýtqa oqýǵa túsedi. 1997 jyly joǵary oqý ornyn támamdap, alǵashqy eńbek jolyn týǵan jeri Syrym elindegi Qadyr Myrzalıev atyndaǵy orta mektepte tarıh páninen sabaq beredi. 2013-2014 jyldary BQO bilim basqarmasynyń oqý-ádistemelik kabınetinde tarıh pániniń ádiskeri, 2014-2021 jyldary qaladaǵy №46 orta mektepte dırektordyń oqý isi jónindegi orynbasary, tarıh pániniń muǵalimi qyzmetterin atqarady. 2021 jyldan beri Dinmuhamed Qonaev atyndaǵy №44 mektep-gımnazııasynyń tarıh pániniń muǵalimi.
Óńirdiń úzdik tarıhshysynyń jetistikteri de jeterlik. Ár kezeńde tynymsyz eńbegi elenip, oblystyq bilim basqarmasynyń Qurmet gramotasyn ıelenip, «Oral qalasynyń qurmetti pedagogy» atandy. Astana qalasy L.N.Gýmılev atyndaǵy Eýrazııa Ulttyq ýnıversıtetinde «Týǵan jer» baǵdarlamasy aıasynda uıymdastyrylǵan «Otan otbasynan bastalady» taqyrybyndaǵy respýblıkalyq jobalar, Úzdik avtorlyq baǵdarlamalar baıqaýlarynda júldeger atanyp júr.
Jeńis Kákibaıulynyń shákirtteri oblystyq, respýblıkalyq baıqaýlar men olımpıadalarynda únemi kósh bastap keledi. Tek aǵymdaǵy jyldyń ózinde oblystyq olımpıadada shákirtteri N.Askarova, A.Meńdibaı, A.Igalıeva júldeli oryndardy ıelengen.
Muǵalim óziniń pedagogıkalyq sheberligin únemi jetildirip keledi, qashyqtan uıymdastyrylatyn pándik olımpıadalarǵa qatysyp, is-tájirıbesimen respýblıkalyq basylym betterinde bólisip otyrady.
– Ata-anam da ulaǵatty ustazdar, sol sebepti abyroıly muǵalim bolmaýǵa haqym joq. Ustazdar áýletinde tárbıelengen soń mamandyq tańdaýda ata-anamnyń yqpaly zor boldy. Kúni búginge deıin ustazdyq mamandyǵyn tańdaǵanyma ókingen emespin. 27 jyldan astam osy salada eńbek etip kelemin, – deıdi tarıhshy.
