Senator TikTok áleýmettik jelisin buǵattaý qajet dep sanaıtynyn málimdedi, dep habarlaıdy "Adyrna" ulttyq portaly.
Senator Gennadıı Shıpovskıh premer-mınıstr Oljas Bektenovke joldaǵan depýtattyq saýalynda TikTok-ty buǵattaý kerek dep sanaıtynyn jetkizdi.
"TikTok áleýmettik jelisi álemniń túkpir-túkpirinde úlken tanymaldylyqqa ıe. Elimizde de bul jelini qoldanýshylar sany artpasa, kemip jatqan joq. Kórshi elge tıesili bul platformany keń kreatıvti janrda jasóspirimderdi kásipke, bilimge, el tarıhyna qyzyqtyrýǵa paıdalanyp ta júr. Biraq ondaı kontent sany ózge kontentpen salystyrǵanda shólge tamǵan tamshydaı. TikTok-taǵy kontenttiń basym bóligi qandaı sarynda ekenin men aıtpasam da ózderińiz baıqap júrsizder", - dedi Gennadıı Shıpovskıh.
Senator kóptegen memleketterde TikTok-qa ishinara tyıym salynyp jatqanyn málimdedi. Gennadıı Shıpovskıhtyń sózinshe, bul máseleniń Úkimet múshelerimen birneshe ret kóterilgen. Biraq áli kúnge deıin nátıje bolmaǵan.
"TikTok platformasy ekstremızmdi, radıkalızmdi, separatızmdi, shekten tys qaýipti jáne moraldyq qundylyqtarǵa qaıshy kontentterdi anyqtaý jáne shekteý boıynsha naqty algorıtmdi usynýy kerek. TikTok platformasy jas balalardy onlaın qaýipti kontentten qorǵaý maqsatynda YouTube Kids sekildi balalarǵa arnalǵan arnaıy jeli usynýy qajet. 13 jasqa tolmaǵan balalardyń TikTok-qa ata-anasynyń telefonynan kirgen jaǵdaıda Face ID tehnologııasy arqyly buǵattaý mehanızmin qarastyrý kerek. Olaı bolmaǵan jaǵdaıda elimizde TikTok platformasyn buǵattaýdy suraımyz", – dedi senator.
Aıta keteıik, depýtat osy ýaqytqa deıin jelidegi paraqshasynda Tiktok-tan tóner qaýip týraly jazǵan bolatyn.
