Jetisý óńirinde múmkindigi shekteýli jandar «Invataksı» qyzmetin turaqty paıdalanady. Jyl basynan beri múmkindigi shekteýli jandarǵa 60 myńnan astam ret qyzmet kórsetilgen. Búgingi tańda oblysta arnaıy qyzmet kórsetetin 34 «Invataksı» bar, – dep habarlaıdy Jetisý oblysy ákiminiń baspasóz qyzmeti.
– Ótken jyly oblys ákimi Beıbit Isabaevtyń tapsyrmasymen jergilikti bıýdjet esebinen 14 jańa «Invataksı» satyp alyndy. Sonyń nátıjesinde oblysta 1 jyldyń ishinde jekemenshik taksıler sany eki esege artty. 2024 jyly 34 avtokólikpen «Invataksı» qyzmetin kórsetý úshin 306,6 mıllıon teńge bólindi, – dedi oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Ermek Mızambaev.
Oblys aýmaǵynda «Invataksı» qyzmetin 8 úkimettik emes uıym júzege asyrady. Onyń ekeýi Taldyqorǵan qalasynda. Biri – «Erlik» múgedekter qoǵamdyq uıymy bolsa, ekinshisi «Taldyqorǵan» korporatıvtik qorynyń «Qazaq zaǵıptar qoǵamy» qoǵamdyq birlestigi. Jalpy, oblys ortalyǵynda barlyǵy 13 mamandandyrylǵan «Invataksı» kóligi múmkindigi shekteýli jandarǵa qyzmet kórsetedi.
– Alǵashynda múmkindigi shekteýli jandarǵa 3 avtokólik qyzmet kórsetetin. Memleket qoldaýynyń nátıjesinde qazir 8 avtokólikke ıe boldyq. «Invataksı» qyzmetiniń júrgizýshileri erekshe qajettilikteri bar adamdardy jumysqa, mektepke, sporttyq, saýyqtyrý sharalaryna alyp barady. Memleket tegin kórsetetin áleýmettik qyzmettiń paıdalanýshysy bolý úshin múgedekterge arnalǵan «Erlik» QB janyndaǵy «Invataksı» qyzmetine múgedektikti rastaıtyn qujattardy tapsyrý qajet. Ótinishter kólikti jetkizýge bir kún qalǵanda telefon arqyly qabyldanady. Belgili bir mekemege baratyn kóliktiń jetkiziletin kúni, ýaqyty jáne ol jerden qaıtatyn ýaqyty kórsetiledi, – deıdi «Erlik» múgedekterge arnalǵan qoǵamdyq uıymnyń ókili Nurbek Turǵanov.
Taldyqorǵan qalasynyń turǵyny Gúlnar Nurǵalıeva birneshe jyldan beri «Invataksı» qyzmetin paıdalanyp keledi. Osy áleýmettik qyzmettiń arqasynda arbaǵa tańylǵan jan kún saıyn jumyspen qamtýdy úılestirý jáne áleýmettik baǵdarlamalar bólimindegi jumysqa ońaı jetip, keshkisin úıine qaıtady.
«Bizdiń qalada osyndaı qyzmettiń baryna qýanyshtymyn. Bul – óte yńǵaıly. Bizge úlken qoldaý dep bilemin. Ásirese, «Invataksıdiń» qyzmet kórsetý sapasy kóńilimizden shyǵady. Óz basym bul kólikti kúndelikti jumysqa baryp, qaıtý úshin paıdalanamyn», – deıdi «Aqjanel» saýyqtyrý ortalyǵynda medbıke bolyp jumys isteıtin Jadyra Qasymova.
Jalpy, Jetisý oblysynda jan-jaqty qoljetimdilikti qamtamasyz etip, kedergisiz orta qalyptastyrýǵa basa nazar aýdarylýda. Máselen, jyl basynan beri 168 áleýmettik ınfraqurylym nysanyna kedergisiz orta qalyptastyrý boıynsha júıeli jumys júrgizildi. Qazirdiń ózinde oblysta bilim, densaýlyq saqtaý, mádenıet, sport nysandaryn, sondaı-aq memlekettik mekemelerdi qosa alǵanda, barlyǵy 628 nysan josparǵa sáıkes jasaqtaldy.
