Joshy hannyń esimin ulyqtaýdy mindetti túrde qolǵa alýymyz qajet. Bul týraly QR Prezıdenti Qasym-Jomart Toqaev Qaraǵandy oblysynda ótip jatqan «Ulytaý – 2019» Halyqaralyq týrıstik forýmynda aıtty, dep habarlaıdy QazAqparat Aqordanyń Twitter-degi paraqshasyna silteme jasap.
«Biz Altyn ordanyń negizin qalaǵan Joshy hannyń esimin ulyqtaýdy mindetti túrde qolǵa alýymyz qajet. Onyń tarıhı tulǵasyna álemniń nazaryn aýdaryp, kesenesin mádenı týrızm nysanyna aınaldyrý – óte mańyzdy mindet»,-dedi Prezıdent. Sondaı-aq Memleket basshysy Uly hannyń úlken uly – Joshynyń mazary qazaq jerinde turǵanyn búginde elimizdegi jáne sheteldegi jurtshylyqtyń kóbi bile bermeıtindigin, ata-babalardyń amanatyna adal bolý – bizge syn ekendigin atap ótti.
