Kömekke qarjy jinaluda. «Reketir» filmınıŋ akterı qaterlı dertke şaldyqty

Tanymal qazaqstandyq akter Mūrat Bisenbinge qaterlı ısık diagnozy qoiylǧan. Būl turaly onyŋ ärıptesı Saiat İsembaev Instagram paraqşasynda mälımdedı, dep habarlaidy “Adyrna” ūlttyq portaly.  İsembaev Bisembinnıŋ emıne qarajat kerek ekenın aityp, halyqtan kömek sūrap, oǧan kömektesu üşın bank rekvizitterın jariialady. Oǧan qazaqstandyq öner jūldyzdary qoldau körsettı. «Mūrat onkologiialyq dertke şaldyqty. Qazır em qabyldap jür. Bärı oidaǧydai bolady, ol öz qalpyna keledı. Qūrmettı dostar, mümkındıgınşe oǧan qarjylyq kömek körseteiık. Bızdıŋ qoldauymyz onyŋ sauyǧyp ketuıne öz yqpalyn tigızedı. Mūrat, senımen bırgemız», – dedı ol. Saiat İsembaevtyŋ ündeuınen keiın, Bisenbinge özge ärıptesterı de qoldau körsete bastady. Olardyŋ ışınde akter Artur Tölepov, Täuekel Müsılım, änşı Bürkıt, bloger Serıkjan Tıleulesov jäne basqalar bar. Aita keteiık, 51 jastaǧy Mūrat Bisenbin 2000-şy jyldardyŋ basynda rejisser Aqan Sataevtyŋ debiuttık «Reketir» kriminaldyq dramasyndaǧy Ruslan rölımen tanymal bolǧan.