Búgin bilim kúninde saraljyndyq balaqaılar jańa oqý jylyn jańa bilim ordasynda bastady. Aýyl halqynyń kópten kútken qýanyshyna oblys ákiminiń orynbasary Qaıyrjan Meńdiǵalıev, aýdan ákimi Aslanbek Sarqulov qatysyp, saraljyndyqtardy quttyqtady.
Bilim kúnine oraı paıdalanýǵa berilip otyrǵan 60 oryndyq mekteptiń ashylý saltanatynda sóz alǵan oblys ákiminiń orynbasary Qaıyrjan Meńdiǵalıev:
— Barshańyzdy bilim kúnimen birge kelgen zor qýanysh, mynadaı keremet mekteptiń ashylýymen oblys ákimi Narıman Tóreǵalıulynyń atynan quttyqtaımyn! Bul — memleketimizdiń sizderge, aýylda otyrǵan qaısar halyqqa, aýylda týyp, aýylda ósip kele jatqan baldyrǵandarǵa tartýy. Osy jyly Prezıdentimizdiń tapsyrmasymen oblysymyzda 11 mektep salynsa, sonyń biri — osy! Bul mektepti KPO b.v. kompanııasy oblys aldyndaǵy áleýmettik mindettemeleriniń aıasynda salyp berip otyr— degen oblys ákiminiń orynbasary mektep ujymy men oqýshylarǵa jyly lebizin bildirdi.
Jańa mekteptiń ashylý saltanatyna oblys jáne aýdan basshylyǵymen qatar, Kaztalov aýdanynyń «Qurmetti azamaty», ardager ustaz, aqyn-jazýshy, qoǵam qaıratkeri Darıǵa Mushtanova, Qarashyǵanaq Petroleým Oıopereıtıng b.v. kompanııasynyń menedjeri Qaırat Bımaǵambetov jáne de bilim salasynyń qyzmetkerleri, qoǵamdyq uıymdar men BAQ ókilderi qatysty.
Saraljyn eldi mekeninde Májıt Júnisov atyndaǵy negizgi orta mektebiniń eski ǵımaraty 1989 jyly salynǵan. 2024 jyly qoldanysqa berilgen jańa mektep ǵımaratynyń qýattylyǵy 60 orynǵa eseptelgen. Jalpy quny – 750 mln teńge. Merdiger - «Aqsaı Stroı Servıs» JShS. Mektep jańa oqý kabınetterimen jabdyqtalǵan. Mektep aýlasynda shaǵyn fýtbol alańy, basketbol, júgirý alańdary jáne demalý orny bar.
Saraljyn — qutty meken. Topyraǵyn túrtse tarıhy kóriner kıeli aýylda el anasy, qoǵam qaıratkeri, aqyn-jazýshy Darıǵa Mushtanova dúnıege kelgen. Jańa bilim ordasynda týǵan jerin alty alashqa tanytyp, abyroıyn asqaqtatqan aqynnyń atynda arnaıy synyp ashyldy.
Aýylym ata qonys qut mekenim,
Babalar aıtyp ketken qutty ekenin.
Qııaǵa qanat qaǵyp perzentteri,
Tanytqan topyraǵynyń myqty ekenin, — dep jyrlaǵan Darıǵa Ǵazezqyzy synybynyń tusaýyn oblys ákiminiń orynbasary Qaıyrjan Meńdiǵalıev, Kaztalov aýdanynyń «Qurmetti azamaty» Baıan Qabıevamen birge kesip, shákirtterge aq batasyn berdi.
Qaımaǵy buzylmaı, órkenıetke qadam basqan aýyl halqy sáýleti kelisken, zamanǵa saı bilim ordasynyń boı kótergeni úshin oblys jáne aýdan basshylyǵyna rızashylyqtaryn bildirdi.