9 mamyr kúni kóligine Keńes Odaǵynyń qyzyl týyn tikken adammen janjaldasyp qalǵan almatylyq Janbolat Shaızada bes táýlikke qamaýǵa alyndy, dep habarlaıdy “Adyrna” ulttyq portaly. Qalalyq ákimshilik sot ony usaq buzaqylyq jasaǵany úshin kináli dep tapty.
Sot úkiminde Janbolat Shaızada qoǵamdyq orynda jol qozǵalysyn toqtatyp, janjal shyǵaryp, ádepsiz sózder aıtyp, kólikke ilingen týdy julyp alyp, «qoǵamdyq tártipti buzdy» dep kórsetilgen.
Esterińizge sala ketsek, 9 mamyr kúni áleýmettik jelide er adamnyń kóliktegi adamdarmen janjaldasyp, kólikten qyzyl jalaýshany julyp alǵany beınelengen vıdeo tarady.
Aıta keteıik, Qazaqstanda keńestik rámizderge tyıym salynbaǵan. Al ony Vengrııada, Chehııada, Polshada, Latvııada jáne Lıtvada, sondaı-aq Grýzııada (2011 jyldan bastap) kópshilikke kórsetýge zań júzinde tyıym salynǵan.
Keńes Odaǵynyń týy kóptegen elderde reseılik ıdeologııanyń belgisi bolyp sanalady.
