Bıyl fashızmdi jeńgen Jeńistiń 79 jyldyǵyn atap ótilýde. Jeńis kúni soǵysqa qatysqan 1 mıllıon 200 myń qazaqstandyqty, olardyń tabandylyǵy men qaharmandyǵyn, sondaı aq tylda eńbek etkenderdiń eńbektegi eren erligin eske alý bolyp tabylady.
Bul jeńiske aǵa býynnyń – atalarymyz ben ákelerimizdiń, ájelerimiz ben analarymyzdyń teńdessiz kúsh-jigeri men orasan zor qurbandyqtarynyń arqasynda qol jetti. Biz árbir batyrdyń qosqan úlesin este saqtaımyz, baǵalaımyz jáne qurmet tutamyz.
Qazaqstandyqtar 20-dan astam atqyshtar dıvızııalary men basqa da quramalarda shaıqasty. Áskerı qyzmeti úshin júzdegen myń qazaqstandyqtar medaldarmen jáne ordendermen marapattaldy, 500-ge jýyq adam Keńes Odaǵynyń Batyry atandy. 4 qazaqstandyq eki ret Batyr atanyp, 110 qazaqstandyq úsh dárejeli Dańq ordenimen marapattaldy.
Jaýynger batyrlardyń esimderi halyq jadynda máńgi saqtalady. Búginde árbir qazaq azamaty M.Mámetovanyń, Á.Moldaǵulovanyń, H.Dospanovanyń, R.Qoshqarbaevtyń, M.Ǵabdýllınnyń, Q.Qaısenovtyń, B.Momyshulynyń, T.Bıgeldınovtyń, L.Bedanyń, I.Pavlovtyń, S. Lýganskııdyń jáne t.b. erligin eske alyp, taǵzym etedi.
Bul – qazaq dalasynyń erjúrek urpaqtary – batyr ul-qyzdaryn máńgi este saqtaý jáne olarǵa alǵys aıtý kúni.
